Монгол Улсын өсөх идэр начин Э.Энхбат начин бусдад зодуулж, биедээ хүнд гэмтэл авсаны улмаас ГССҮТ-ийн сэхээн амьдруулах тасагт, унтуулга хийлгэсэн байдалтай хэвтэн эмчлүүлж буй. Уг хэрэгт түүний сайн найз, Олимпийн аварга Н.Түвшинбаярыг яллагдагчаар татаж, 20 хоног цагдан хорих ял оноосон бөгөөд ШШГЕГ-ын харьяа 461 дүгээр хорих ангид хоригдож байгаа. Харин Э.Энхбат начны унтуулгын үйлчилгээ өчигдөр 14:00 цагт гарна гэх мэдээлэл гараад байсан юм.

Тэгвэл түүний биеийн байдал хэр байгаа талаар гэргий нь болох Б.Нандинцэцэгээс тодруулахад “Өчигдөр аппаратыг нь салгаад өөрөөр нь сэргээх гэтэл ухаан ороогүй. Иймд эмчилгээ нь өмнөхөөрөө хийгдэж эхэлсэн. Мэдээгүйжүүлэг хийгээд хагалгаанд оруулж байгаа мэт унтуулаад байгаа зүйл байхгүй. ГССҮТ-д хүргэгдэж ирэхдээ комын байдалтай, ухаангүй ирсэн” гэлээ.