Гэр бүл, хөдөлмөр, нийгмийн хамгааллын яам, Азийн хөгжлийн банкнаас хамтран хэрэгжүүлсэн “Цар тахлын үед хариу арга хэмжээ авах нийгмийн хамгааллын төсөл 2” төслийн хүрээнд Төгсөлтийн аргачлалын туршилтын хөтөлбөрийг амжилттай хэрэгжүүлж, өнөөдөр /2025.08.29/ төслийн хаалтын арга хэмжээ боллоо. Төгсөлтийн аргачлалын туршилтын хөтөлбөр нь 2022 оны 6 дугаар сараас хэрэгжиж эхэлсэн бөгөөд Цар тахлын дараах үеийн хямралыг даван туулж ядуурлаас сэргийлэх, амьжиргаагаа сайжруулахад нь зорилтот хүн ам, өрхөд дэмжлэг үзүүлэх зорилготой байсан юм. Энэ төсөл хөтөлбөрийн хүрээнд тодорхойлсон зорилго, зорилтууд, төлөвлөсөн ажил 96 хувьтай хэрэгжсэн байна. Хөтөлбөрт 1,259 өрх хамрагдаж, нийт өрхийн 80.6 хувь нь өрх төгсөлтийн шалгуурыг хангаж, хөтөлбөрөөс олгосон тоног төхөөрөмжийг ашиглан өрхийн үйлдвэрлэл эрхэлж эхэлжээ.Хөтөлбөр хэрэгжих хугацаанд эерэг олон сайн туршилтуудыг бий болгосон.Суурь судалгааны үнэлгээгээр өрхийн гишүүдийн 33.62 хувь нь хөдөлмөр эрхэлж байсан бол төгсөлтийн шалгуураар 93.3 хувь болж, орлогын эх үүсвэр нэмэгдсэн. Халамжийн дундын бүлэгт хамрагдаж байсан өрхийн тоо 4 хувиас 86.6 хувь болж өссөн. Өрхийн насанд хүрсэн гишүүд төсөлд хамрагдахаас өмнө 4 хувь нь техникийн болон мэргэжлийн боловсролтой байсан бол хөтөлбөр хэрэгжих хугацаанд 99 хувь нь мэргэжлийн болон техникийн ур чадварын сургалтад хамрагджээ. Гэр бүл, хөдөлмөр, нийгмийн хамгааллын яам Нийгмийн халамжийн тухай хуулийн төслийг шинэчлэн боловсруулсан бөгөөд өрх, иргэний бие даан амьдрах чадварыг дээшлүүлэх энэ шинэ туршилтыг улсын хэмжээнд хэрэгжүүлдэг байхаар хуулийн төсөлд тусган ажиллаж байна.