Алтан намрын дуниартсан шаргал өдрийн мэндийг айлтгаж, эрхэм харилцагчиддаа “Үндэсний давхар даатгал” ХК үүсэн байгуулагдсаны түүхт 11 жилийн ойн баярын мэнд дэвшүүлье!

“Үндэсний давхар даатгал” ХК нь Монгол Улсын эдийн засгийн тогтвортой хөгжлийг хангах, валютын гадагшлах урсгалыг бууруулах, олон улсын стандартад нийцсэн давхар даатгалын тогтолцоог хөгжүүлэх зорилгоор 2014 оны 08 дугаар сарын 28-ны өдөр байгуулагдаж байсан юм.

Бид олон улсын зээлжих зэрэглэл тогтоогч AM Best агентлагаас хоёр дахь жилдээ ерөнхий санхүүгийн чадавхын хувьд B, урт хугацааны зээлжих зэрэглэлийн хувьд BB+, цаашдын төлөвөө “Тогтвортой” үнэлгээ авч баталгаажуулж, компанийн үндсэн үйл ажиллагааг дэмжих, компанийн хөрөнгө, үйл ажиллагааны үнэ цэнийг нэмэгдүүлэх, гүйцэтгэлийн болон чанарын бодлогыг хэрэгжүүлэх ажлын хүрээнд компанийн үйл ажиллагаандаа ISO стандартыг нэвтрүүлэн ажиллаж байна.

Олон улсын стандартад нийцсэн давхар даатгалын үйлчилгээг үзүүлэн ажиллахдаа олон улсын зээлжих зэрэглэл тогтоогч байгууллагуудын хамгийн өндөр үнэлгээ бүхий дэлхийн шилдэг давхар даатгалын компаниудтай хамтран ажиллаж харилцагчдынхаа эрсдэлгүй байдлыг ханган ажиллаж, давхар даатгалын үйлчилгээг экспортолж эхлээд байна.

“Үндэсний давхар даатгал” ХК-ийн хамт олноос хамтран ажиллагч эрхэм түнш байгууллагууд, эрхэм үйлчлүүлэгчдэдээ чин сэтгэлийн халуун талархал илэрхийлж, сайн сайхны дээдийг хүсэн ерөөе!