"Хөгжлийн банкны хэрэг"-ийг анхан шатны шүүх дахин хэлэлцэхээр болсон билээ. Тэгвэл тус хэргийн шүүх хурал эдгээр өдрүүдэд болж, Сүхбаатар, Чингэлтэй, Баянзүрх дүүргийн Эрүүгийн хэргийн анхан шатны тойргийн шүүх өнөөдөр шийдвэрээ гаргалаа. Тодруулбал, Н.Батбаярт хөөн хэлэлцэх хугацаа дууссан үндэслэлээр хэргийг хэрэгсэхгүй болгож, Н.Мөнхбатад 18.4 сая төгрөгөөр торгох ял оноож хоригдсон хоногийг хасаж, Б.Даажамба 39.9 сая төгрөгөөр торгох, н.Баярмангайд 10 сая торгох, Ц.Билгүүн 7 сая төгрөгөөр торгох, н.Бүтдэд 1.6 жил зорчих эрхийг хязгаарлах ял Ц.Баатарбилэгт 4 жил зорчих эрхийг хязгаарлах ял, Б.Батбаатарт 1 жил 11 сар зорчих эрхийг хязгаарлах ял, Г.Байгалмаад оноосон 3 сая төгрөгөар торгох ял оноож өршөөл үзүүлж, 6 сар зорчих эрхийг хязгаарлах торгох ял, "Бэрэн" компанийн н.Мөнхтөр 5 жилийн хорих ял зэргээр шийдвэрлэлээ. 

    Хэргийн талаар эргэн сануулахад,  УИХ-ын гишүүн, Ерөнхий сайд асан Н.Алтанхуяг, Эдийн засаг, хөгжлийн сайд асан Н.Батбаяр нар эрх мэдэл, албан тушаалын байдлаа урвуулан ашиглаж “Говийн зам” ХХК-ийн барьсан замыг Хөгжлийн банкны санхүүжилтээр төрд худалдаж авсан, “Бэрэн” ХХК-д 2014 онд Хөгжлийн банкнаас зээл олгосон гэх хэргүүдийг анхан болон давж заалдах шатны шүүхээс хэрэгсэхгүй болгосон байдаг. Гэсэн ч Улсын дээд шүүх тус хэргийг хэлэлцээд анхан болон давж заалдах шатны шүүхийн дүгнэлт нь хэргийн бодит байдалтай нийцээгүй, хэрэгт ач холбогдол бүхий нөхцөл байдлыг анхаарч үзэлгүй орхигдуулсан учир прокурорын эсэргүүцлээс зарим хэсгийг хангаж, Н.Алтанхуяг, Н.Батбаяр, Б.Шинэбаатар, Н.Мөнхбат нарыг дээрх хэргүүдэд цагаатгасан шийдвэрийг хүчингүй болгож, гэм буруутай эсэхийг дахин хэлэлцүүлэх нь зүйтэй гэж үзсэн байдаг.