Орхон аймгийн Баян Өндөр, Жаргалант сумдын нутагт “Оюут” нэртэй шинэ зэсийн орд нээгдлээ. Хайгуулын урьдчилсан үр дүнгээр 357 сая тонн хүдрийн нөөцтэй гэж тогтоогоод байгаа нь улсын төсөвт түшиг тулгуур болохуйц томоохон орд юм. Энэ нь Монголчуудын амьдралын түвшинг дээшлүүлэх, ашиг орлого нэмэгдүүлэх, эдийн засгийн хөгжилд шинэ боломж нээж байна.

Монгол Улсын Ерөнхий сайд Г.Занданшатар нээлтийн үйл ажиллагаанд оролцож, “Газрын хэвлийн баялгийн үр өгөөжийг Үндэсний баялгийн санд төвлөрүүлж, иргэн бүрд тэгш, шударга хүртээх талаар Үндсэн хуулиараа баталгаажуулсан. Иргэн бүр өөрийн дансандаа хуримтлал үүсгэж, хэрэгцээндээ тохируулан зарцуулах боломж нээгдэж байна. Цаашид шинэ орд, хүдэржилтийн бүсэд төлөвлөлт, бүтээн байгуулалтыг оролцогч талуудтай нягт харилцан ярилцаж, орон нутгийн захиргаатай хамтран ажиллах шаардлагатай” гэв.

Ерөнхий сайд мөн “Оюут ордыг түшиглэн жилд 5-10 сая тонн хүдэр боловсруулах хүчин чадалтай баяжуулах үйлдвэр барих ТЭЗҮ боловсруулах үүрэг даалгавар өглөө. Энэ тооцооллоор Оюут ордыг 30-35 жил ашиглах боломжтой” гэж онцолсон юм.

Эрдэнэт үйлдвэрийн геологичид хайгуулын ажлыг бие даан гүйцэтгэж, ордыг ашиглах зураг төсөл, бүтээн байгуулалтад тус үйлдвэрийн шилдэг инженерүүд оролцоно. Оюут орд нь Эрдэнэтийн Овоо ордоос 8 км, Үйлдвэрлэл технологийн паркийн дэд бүтцээс 3 км зайд оршиж байгаа нь нэн таатай нөхцөл бүрдүүлж байна.

Оюут зэсийн ордыг нээснээр Үндэсний баялгийн сан арвижиж, үйлдвэр дагасан Эрдэнэт хот, Орхон аймаг, хойд бүс, цаашлаад Монгол Улсын нийгэм, эдийн засгийн хөгжилд том түлхэц болох юм.