УИХ-ын гишүүн О.Номинчимэг сэтгүүлчдэд мэдээлэл өглөө. Тэрбээр “Монгол Улсын хувьд тамхидалт маш хурдацтайгаар өсөж байна. Хүүхэд залуучуудын хувьд 2023 оны ДЭМБ-ийн хийсэн судалгаагаар таван хүүхэд тутмын нэг нь янжуур тамхи татдаг, дөрвөн хүүхэд тутмын нэг нь электрон тамхи татдаг гэсэн судалгаа гарсан. Энэ тоо бодит амьдрал дээр маш өндөр байгааг багш нар ярьж байна. 2025 оны судалгаагаар энэ тоо огцом өсөж хүүхдүүдийн 60 хувь нь электрон тамхи татаж үзсэн, 33 хувь нь байнгын хэрэглээтэй болсон гэх тоон судалгаа гарсан. Манай Улс Ази номхон далай бүсдээ тамхидалт болон тамхинд донтсон иргэдийн тоогоор долоод бичигддэг. Үүнээс гарч байгаа эрүүл мэнд, эдийн засгийн зардлыг тооцоолж үзвэл нэлээд өндөр тоо гарч байгаа. Тамхинаас үүдэлтэй нас баралтаар өндөрт жагсаж байна. Жил бүр 4300 хүн тамхинаас үүдэлтэй нас барч байна гэсэн тооцоолол гарсан.  Энэ тоог бууруулахын тулд хүүхэд залуучуудыг донтолтоос сэргийлэхийн төлөө бодлого гаргадаг, хууль тогтоогч бид эцэг, эхчүүд боловсролын байгууллагатай хамтарч “Тамхигүй, хорт зуршилгүй сургууль” аяныг өрнүүлж байна" гэв.