Испани Улсад энэ сард 16 хоног дараалан хэт халалт үргэлжилж тус улсын түүхэнд байгаагүй өндөр үзүүлэлт болсон талаар цаг уурын агентлаг мэдээллээ.

Зөвхөн наймдугаар сард гэхэд л халуунаас үүдэн 1100 гаруй хүн нас барсан байна. Харин өнгөрсөн долдугаар сард 1060 хүн хэт халалтын улмаас эндсэн байж болзошгүй хэмээн үзжээ. Улмаар наймдугаар сарын хэт халалтын улмаас нас барагсдын тоо өмнөх сараас 50 хувиар өссөн байна. Хэт халалт зөвхөн хүний амь насанд нөлөөлөөд зогсохгүй байгаль орчинд ч ноцтой хохирол учруулж байна. Наймдугаар сарын халууны улмаас ой хээрийн түймэр олон газар гарч, дор хаяж дөрвөн хүн амиа алдсан бөгөөд мянга мянган хүн орон гэрээ орхин нүүлгэн шилжихэд хүрчээ. Хөрш Португал улсад ч мөн түймрийн улмаас дөрвөн хүн амиа алджээ.

Испанийн хойд нутгуудад дэгдсэн түймэр өнгөрсөн долоо хоногт 350 мянга гаруй га талбайг хамарч, он гарсаар нийтдээ 400 мянга гаруй га талбай сүйдсэн байна. Одоогоор түймрийг цурманд оруулах ажил эхэлж, Европын есөн орны гал сөнөөгчид болон гал унтраах зориулалттай нисэх онгоцууд Испанийн онцгой байдлын албаныханд туслалцаа үзүүлж байгаа аж.