2022 онд 1111 удаах сонс эргэж Гиннессийн дээд амжилт тогтоосон С.Батцэнгэлтэй ярилцлаа. Тэрбээр өөрийн амжилтыг шинэчилж 1206 эргэх зорилготойгоор бэлдэж байгаа аж.

-Танд энэ өдрийн мэнд хүргэе. Манай уншигчдад өөрийгөө танилцуулаад яриагаа эхлэх үү?

                -Намайг Соёл-Эрдэнийн Батцэнгэл гэдэг. Дорнод аймгийн ерөнхий боловсролын тавдугаар сургуулийг төгссөн. Багаасаа хөнгөн атлетикийн спортоор хичээллэдэг байсан. Сургуулиа төгсөөд БХИС-н ахлагчийн сургуульд орж 2014 онд төгсөөд Дорнод аймгийн Зэвсэгт хүчний 327 ангид томилогдон ирж 2023 он хүртэл ажилласан.

-Гиннессийн дээд амжилтыг тогтоосон гэдгээ мэдэх үед ямар мэдрэмж төрж байсан бэ. Тухайн үеийн сэтгэл хөдлөлийг дурдвал?

                -Анхнаасаа өөртөө Гиннесийн дээд амжилт эвдэх зорилго тавьсан байсан. Өөрөөрөө бахархаж маш их догдолж байсан. Аавынхаа, Монголынхоо болоод цэргийн ангийнхаа нэрийг дэлхийд данстай болгосондоо маш их баяртай байдаг.

-Гиннесст хэрхэн бүртгэгдсэн түүхээсээ хуваалцаач. Хэдэн жил турникээр хичээллэж байна вэ?

                -Ер нь их л ажил болж байж бүртгэгдсэндээ. Анх найзтайгаа, багштайгаа, орчуулагчтай хамтраад майл явуулж байсан. Хариу өгөлгүй нэг сар гаран болоод сүүлдээ эхнэртэйгээ хамтраад хэд хэд явуулж, өөрсдөө хөөцөлдөж байж бүртгэгдсэн. Гиннес дээд амжилт бүртгэх газар руу 1111 удаа эргэсэн бичлэг зургаа явуулсан. Гэр бүл, Зэвсэгт хүчний жанжин штабын сургалтын хэлтэс, Дуулга студи хамтаар явуулсан. Турникээр 2016 оноос сонирхлын журмаар анх хичээллэж эхлээд Зэвсэгт хүчний аварга шалгаруулах тэмцээнд орж байгаад сонс эргэлтээр амжилт гаргах зорилго тавьсан даа.

-Тасралтгүй 37 минутын турш 1111 удаа эргэхэд хэр хүндрэлтэй байсан бэ?

                -Мэдээж хүндрэлтэй асуудал гарна. Биеийн бүх булчин ажиллаж ачаалдаг. Зүрхний цохилт өндөрсөнө, амьсгал давчдах, толгой бага зэрэг эргэнэ, мөр чилнэ. Гэхдээ тун сонирхолтой шүү.

-Сонс эргэх спортыг өөрөө бие даан сурсан уу, багш байгаа юу?

                -Анх нэг оны цэргээ харж байгаад сурч байсан. 2016 онд анхны Зэвсэгт хүчний аварга шалгаруулах тэмцээнд багшийн заавар дор оролцож 403 удаа эргэн түрүүлж байсан.

-Турникээр хичээллэхийн давуу тал нь юу юм бэ?

                -Хөдөлгөөний дутагдлаас сэргийлнэ, зүрх судасны үйл ажиллагаа сайжирна, биеийн булчингууд жигд хөгжинө, нурууны суултаас сэргийлнэ.Хичээллэхийг хүссэн хүмүүс бие бялдрын өв тэгш хөгжилтэй байх, биеэ хоёр гар дээрээ даадаг, тэсвэр хатуужилтай байх хэрэгтэй.

-Хэзээнээс цэргийн хүн болъё гэж бодсон бэ. Яагаад энэ мэргэжлийг сонгосон юм бэ?

                -Анх сургуулиа төгсөөд цэргийн хүн болно гэж шийдсэн. Цэргийн хүн сүр жавхлантай, эх орныхоо төлөө зүтгэдэг гэдэг таалагдсан.

-Таны бодлоор цэргийн алба хаагч байхын сайхан тал нь юу вэ?

                -Эр зориг, тэсвэр тэвчээр хатуужилтай болдог. Аливаа зүйлд тууштай байж, ард нь гардаг даа.

-Таны хувьд сонс эргэхээс гадна хөнгөн атлетикаар хичээллэдэг гэсэн. Энэ талаараа дэлгэрэнгүй яривал?

                -Хөнгөн атлетикаар багаасаа хичээллэдэг байсан олон удаа аймаг,улсын тэмцээнд түрүүлж байсан. 2017 оноос дахин гүйж эхэлсэн одоо олон улсын хэмжээний мастер цолтой.

-Рекордоо дахин эвдэхээр бэлдэж байгаа юу?

                -Рекордоо дахин эвдэх төлөвлөгөө байгаа, бэлтгэлдээ орсон. Ард түмэн болоод улс орон маань дэмжвэл Их Монгол Улс байгуулагдсан буюу 1206 эргэх зорилготой байгаа. Дэлхийн дансанд Монгол орноо бичүүлсэн өөрөөрөө маш их бахархдаг.