ОХУ-ын Хабаровск хотноо “Үйлдвэрийн осол, байгалийн гамшгаас урьдчилан сэргийлэх, тэдгээрийн үр дагаврыг арилгах салбарт хамтран ажиллах тухай “Монгол Улсын Засгийн газар, Оросын Холбооны Улсын Засгийн газар хоорондын хэлэлцээрийг хэрэгжүүлэх хамтарсан комиссын ээлжит XX  хуралдаан болж, ОХУ-ын Онцгой байдлын асуудал эрхэлсэн сайд, дэслэгч генерал Ккуренков Александр Вячеславович, ОБЕГ-ын дарга, хошууч генерал Г.Ариунбуян нар протоколд гарын үсэг зурлаа.

Хамтарсан комиссын хуралдаанаар Монгол-Орос-Хятад гурван улсын аврах албаны хамтарсан дадлага сургуулилтыг тогтмолжуулах, хүн ам суурьшсан газар нутгийг ой, хээрийн гал түймрээс хамгаалах, түлш, эрчим хүчний байгууламжид гарсан гал түймрийг унтраах чиглэлээр мэргэжилтэн бэлтгэх, эрэн хайх, аврах ангиудын техник тоног төхөөрөмжийг сайжруулах чиглэлээр туршлага солилцох, гүний усны шумбалтын чиглэлээр мэргэжилтэн бэлтгэх, олон улсын үзэсгэлэнгийн арга хэмжээнд оролцоход дэмжлэг үзүүлэх зэрэг асуудлуудыг ярилцаж, харилцан тохиролцлоо.

Мөн хуралдаанаар хэлэлцэн тохиролцсоны дагуу ОХУ-ын Иргэний хамгаалалт, онцгой байдал, тэдгээрийн хор уршгийг арилгах яам, Монгол Улсын Онцгой байдлын ерөнхий газар хоорондын 2026-2027 оны хамтын ажиллагааны төлөвлөгөөг баталлаа.