2025 оны энэ хичээлийн жилээс эхлэн 10 жил тасралтгүй мал малласан иргэний нэг хүүхэд төрийн өмчийн их дээд сургуульд үнэ төлбөргүй сурах эрхтэй болох хууль хэрэгжиж эхэлнэ.

Монгол Улсын “Малчны тухай хууль” 2024 оны зургаадугаар сарын 5-ны өдөр батлагдсан бөгөөд тус хуулийн 4.2.5 дугаар заалтад “Малчнаар 10-аас доошгүй жил тасралтгүй ажилласан малчны нэг хүүхдийг мал аж ахуй, тэжээл, бэлчээр судлалын чиглэлийн мэргэжлээр төрийн өмчийн дээд боловсролын сургалтын байгууллагад үнэ төлбөргүй суралцуулах” гэж заасан байна. Энэхүү заалт нь малчдын хөдөлмөрийг үнэлж, тэдний хүүхдүүдэд боловсролын тэгш боломж олгох, мөн орон нутагт мал аж ахуйтай холбоотой мэргэжилтнүүдийг бэлтгэх зорилготой юм. Малчид болон тэдний гэр бүлүүдэд зориулсан энэ дэмжлэг нь Монголын хөдөө аж ахуй, мал аж ахуйн салбарын хөгжилд чухал түлхэц болох бөгөөд ирээдүйд залуу малчдыг мэргэжлийн өндөр түвшинд бэлтгэх боломжийг нэмэгдүүлэх юм.