Өнөөдөр “Аавуудын баярын өдөр” тохиож байна. Энэ өдрийг 2005 оноос эхлэн албан ёсоор тэмдэглэж ирсэн бөгөөд 2003 онд байгуулагдсан “Монголын эрэгтэйчүүдийн холбоо” аавуудын үүрэг, хариуцлага, гэр бүлдээ гүйцэтгэх үнэ цэнийг олон нийтэд таниулах зорилгоор санаачлан бий болгосон юм.

Манай улс аавуудын баярыг тэмдэглэдэг дэлхийн 18 дахь орон бөгөөд энэ уламжлалын түүх 1910 оноос эхтэй. АНУ-ын Вашингтон мужийн Соноро Смарт Додд хэмээх эмэгтэй эхийн баярт өдөр шиг аавуудын буян, халамжийг хүндэтгэх өдөр байх ёстой гэж үзэн, анх аавдаа зориулан уг баярыг санаачилжээ. Статистикийн мэдээллээр Монгол Улсад 3.544.835 хүн амьдарч байгаагийн 1.736.973 нь эрэгтэй бөгөөд тэдний 20 гаруй мянга нь өрх толгойлсон аавууд байна. Аавуудын баярын өдөр нь зөвхөн гэр бүлийн хүрээнд төдийгүй нийгмийн хэмжээнд аавуудын үнэ цэнийг ухаарч, тэдний хөдөлмөр, зүтгэлийг үнэлэх боломжийг олгодог онцгой өдөр аж.