Дэлхийн Цаг уурын байгууллагын мэдээлснээр, Ази тивийн уур амьсгал дэлхийн дунджаас хоёр дахин хурдан өөрчлөгдөж байгаа бөгөөд өнгөрсөн 30 жилийн хугацаанд хэт халуун, ган гачиг, үерийн улмаас бүс нутгийн хэмжээнд нийт хоёр их наяд ам.долларын хохирол учирчээ.

Энэ зун Япон, Өмнөд Солонгост олон жилийн дунджаас давж халж байгаа бол Хятад, Энэтхэг, Пакистанд аадар бороо, үерийн гамшиг нүүрлэв. Японы Гүнма мужийн Исэсаки хотод өнгөрсөн мягмар гарагт 41.8°C хүрч халсан нь тус улсын түүхэн дэх хамгийн өндөр үзүүлэлт болов. Хэт халууны улмаас тус улсад 56 хүн нас барж, төмөр замын эд анги гажсан тул зарим чиглэлийн галт тэрэгний хөдөлгөөнийг түр зогсоожээ. Өмнөд Солонгост энэ зун халуун урт хугацаанд үргэлжилж, 22 өдөр дараалан шөнийн агаарын хэм 25°C-аас дээш байв. Вьетнамын нийслэл Ханойд ч наймдугаар сарын эхээр 40°C давсан халалт анх удаа бүртгэгдлээ. Нөгөөтэйгүүр, Хятад, Энэтхэг, Пакистан зэрэг оронд хүчтэй аадар бороо, үерийн гамшиг нүүрлээд байна. Хятадын өмнөд болон хойд мужуудад болсон үерт олон хүн амь үрэгдэж, зөвхөн Бээжинд болсон нэг удаагийн үерийн үеэр ахмадын асрамжийн газарт 31 хүн нас баржээ. Мөн Энэтхэгийн Уттаракханд мужид болсон гэнэтийн үерийн улмаас 100 гаруй хүн сураггүй болоод байна. Пакистанд сүүлийн хоёр сарын хугацаанд үерийн улмаас 300 орчим, түүний дотор 100 гаруй хүүхэд амиа алдсан юм. Мэргэжилтнүүд уур амьсгалын өөрчлөлтөөс үүдэлтэй гамшгийн давтамж, хохирол цаашид улам нэмэгдэх эрсдэлтэйг онцолж, бүс нутгийн улс орнууд хамтран урьдчилан сэргийлэх, дасан зохицох арга хэмжээг яаралтай авах шаардлагатайг анхааруулж байна.

Эх сурвалж: BBC