Өнөөдрийн байдлаар улсын хэмжээнд дөрвөн ой, хээрийн түймэртэй байна. Увс аймгийн Сагил сум, Хөвсгөл аймгийн Цагааннуур, Улаан-Уул суманд гарсан гурван ойн түймрийг цурамд оруулж, бүрэн унтраахаар ажиллаж байгаа бол Баян-Өлгий аймгийн Булган суманд гарсан ойн түймрийг хяналтад авч, цурамд оруулах ажиллагааг эхлүүлжээ.

Түймрийн голомтод Онцгой байдлын байгууллагаас 66 алба хаагч, долоон автомашин, мэргэжлийн ангийн 70 хүн, найман автомашин, нийт 136 хүн, мөн нэг нисдэг тэрэг, 15 автомашин, хоёр мотоцикль, 28 морь дайчлагдан ажиллаж байна. Мөн Сэлэнгэ аймгийн Ерөө сумын “Гуртын уулын хойд тал” гэх газарт гарсан ойн түймрийн унтраах ажиллагаанд оролцсон алба хаагчдыг ОБЕГ-ын Агаараас эрэн хайх, аврах 111 дүгээр ангийн нисдэг тэргээр татан авах ажиллагаа үргэлжилж байна. Онцгой байдлын байгууллагаас хуурайшилт ихтэй, салхи ширүүссэн үед түймэр хурдтай тархах аюултайг анхааруулж, иргэдийг ой, хээрт ил задгай гал түлэхгүй байхыг зөвлөж байна.