Аялал, амралтын улирал ид үргэлжилж буй энэ өдрүүдэд гол, мөрөн, нуурын эрэг дагуу иргэдийн аюулгүй байдлыг хангах зорилгоор завьт болон хөдөлгөөнт эргүүлүүд улсын хэмжээнд идэвхтэй үүрэг гүйцэтгэж байна.

Онцгой байдлын алба хаагчид нийслэлийн долоон дүүрэг болон 13 аймгийн нутаг дэвсгэрийн 43 байршилд өдөр бүр ажиллаж, амарч зугаалж буй иргэдэд гол, усны ослоос урьдчилан сэргийлэх мэдээ, мэдээллийг шуурхай хүргэж байна. Тэд сэрэмжлүүлэг тараах, аюултай бүсээс холдуулах, хүүхдийг хараа хяналтгүй орхихгүй байх талаар зөвлөмж өгөх зэрэг олон чиг үүргийг хэрэгжүүлж байгаа юм. Ийнхүү хөдөлгөөнт болон завьт эргүүлүүд ирэх 2025 оны есдүгээр сарын 15-ныг хүртэл хяналт, эргүүл шалгалтын ажлаа үргэлжлүүлж, иргэдийн амь нас, эрүүл мэндийг хамгаалахад анхаарч ажиллах юм. Мэргэжлийн байгууллагуудын мэдээлснээр, зуны улиралд гол, усны ослын тоо нэмэгдэх хандлагатай байдаг тул иргэдийг бага насны хүүхдийг хараа хяналтгүй орхихгүй байх, анхааруулга тэмдэгтэй газарт сэлэхгүй байх, аврах хантаазгүйгээр завь болон усан тээврийн хэрэгсэлд суухгүй байхыг онцгойлон анхааруулж байна.