Орон тооны цомхотголын улмаас улсын хэмжээнд 51 сум, 24 хороо нийгмийн ажилтангүй болох нөхцөл байдал үүсээд байна. Энэ талаар Хүүхэд, гэр бүлийн хөгжил, хамгааллын ерөнхий газрын дарга Б.Баярсайхан мэдээллээ.

Тэрбээр “Цаг үеийн нөхцөл байдалтай холбогдуулан нийт 75 нийгмийн ажилтан, салбарын хэмжээнд 176 албан хаагчийн орон тоог цомхотгохоос өөр аргагүйд хүрсэн. Жишээлбэл, Архангай аймгийн хоёр сум нийгмийн ажилтангүй болсон. Тэнд амьдарч буй иргэд, хүүхдүүдийн хөгжил, хамгаалал яах вэ гэдэгт бид маш ихээр санаа зовниж байна. Манай салбарын албан хаагчдын сарын цалин ердөө 954 мянгаас 2.1 сая төгрөг байдаг. Улс орны хамгийн хүнд, чухал салбарт ажиллаж буй энэ хэдхэн ажилтнууд маань хүүхэд, гэр бүлийн сайн сайхны төлөө сэтгэлтэйгээсээ л болж ажилласаар байна” гэв.