Наймдугаар сарын 4-6-ны өдрүүдэд БНСУ-ын Пёнчан хотод дугуйт цанын насанд хүрэгчдийн “Азийн цом”-ын аварга шалгаруулах тэмцээн боллоо. Тэмцээнд БНХАУ, БНСУ, Тайвань, Тайланд, Монгол, Казахстан, Филиппин гэсэн долоон орны шилдэг тамирчид оролцож, ойр болон холын зайн төрөлд хурд хүчээ сорьсон.

Эмэгтэйчүүдийн арван км сонгомол зайн бөөн гараатай уралдаанд Монголын тамирчин Э.Ариунтунгалаг амжилттай оролцож, хүрэл медалийн эзэн боллоо.  Мөн тус зайд Н.Нандинцэцэг долоодугаар байр эзэлсэн бол Т.Ариунболд 10, Б.Номин-Эрдэнэ 12 дугаар байрт оржээ. Эрэгтэйчүүдийн 15 км сонгомол техникийн бөөн гараатай уралдаанд Б.Ачбадрах дөрөвдүгээр байр эзэлж, медалийн болзол тун ойр амжилт үзүүлэв. Т.Өсөх-Ирээдүй есдүгээр байр, О.Золбаяр 14, А.Хүслэн 24-р байрт шалгарсан бөгөөд нийт 52 тамирчин өрсөлдсөнөөс хоёр тамирчин маань эхний 10-т багтсан амжилтыг үзүүлсэн юм.

Тэмцээний багийн дүнгээр БНСУ тэргүүлсэн бол Тайвань, БНХАУ, Казахстанын багууд удаалсан байна. Монголын баг гурван хүрэл медальтайгаар тавдугаар байрт шалгарчээ. Дугуйт цанын “Азийн цом”-ын дараагийн тэмцээн аравдугаар сард Казахстан улсад болно.