2025 оны наймдугаар сарын зургааны өдрийн 15:00 цагийн байдлаар улсын хэмжээнд нийт зургаан ойн түймэр идэвхтэй байна. Түймрийн голомтуудад Онцгой байдлын байгууллагаас цогц арга хэмжээ авч, бүрэн унтраахаар ажиллаж байгаа талаар ОБЕГ мэдээллээ.

Одоогийн байдлаар:

Сэлэнгэ аймгийн Мандал суманд хоёр, Увс аймгийн Сагил суманд нэг буюу нийт гурван ойн гал түймрийг цурамд оруулсан бөгөөд бүрэн унтраахаар ажиллаж байна.

Харин Хөвсгөл аймгийн Цагааннуур, Улаан-Уул сум, Баян-Өлгий аймгийн Булган суманд гарсан нийт гурван ойн гал түймэр хяналтад байгаа бөгөөд цурамд оруулахаар арга хэмжээ авчээ. Түймрийн голомтуудад Онцгой байдлын 227 алба хаагч, 17 автомашин, нэг нисдэг тэрэг, мэргэжлийн ангийн 72 хүн, дөрвөн автомашин, 29 морьтой алба хаагч буюу нийт 299 хүн, 21 автомашин, нэг нисдэг тэрэг, 29 морь бүрэн хүчээр ажиллаж байна. Онцгой байдлын ерөнхий газраас иргэдийг ой, хээрийн бүсэд зорчихдоо галын аюулгүй байдлыг чанд сахих, түймрийн голомтод ойртохгүй байхыг анхаарууллаа.