Монгол Улсын Ерөнхий сайд Г.Занданшатар Богд хааны ордон, түүх, соёлын үнэт өвийг хадгалан хамгаалах, хойч үед өвлүүлэн үлдээх зайлшгүй шаардлагыг онцлон тэмдэглэж, холбогдох албан тушаалтнуудад тодорхой үүрэг, чиглэл өглөө.

1911 оны Үндэсний эрх чөлөөний хувьсгалын удирдагч, Монгол Улсын сүүлчийн эзэн хаан Жавзандамба хутагтын ордон нь Монгол төрийн түүх, нийслэл Улаанбаатар хотын үүсэл хөгжилтэй салшгүй холбоотой түүхэн үнэт дурсгал юм. Уг ордныг төрөөс хамгаалах зорилгоор 1961, 1971 онд Сайд нарын Зөвлөлийн тогтоолууд гарч байв. Гэвч Богд хааны зуны ордны залгаа 700 мкв талбайг 2007 онд иргэнд өмчлүүлж, барилга барих зөвшөөрөл олгосон нь түүх, соёлын өвийг хамгаалах төрийн үүрэг хэрэгжээгүйг илтгэж байна хэмээн Ерөнхий сайд үзэж, дараах арга хэмжээг авахыг үүрэг болголоо. Үүнд:

• 2007 оны өмчлүүлэх шийдвэрийг шалгах: Хан-Уул дүүргийн 11-р хорооны нутаг дахь 700 мкв газрыг иргэнд өмчлүүлсэн Нийслэлийн Засаг даргын 523 дугаар захирамж нь хуульд нийцсэн эсэхийг шалгаж, зөрчил илэрсэн тохиолдолд холбогдох албан тушаалтныг хуулийн байгууллагад шилжүүлэн шалгуулах, учруулсан хохирлыг нэхэмжлэх. Үр дүнг энэ сард багтаан Засгийн газарт танилцуулах.
• Барилгын зөвшөөрлийг түдгэлзүүлэх: Шалгалтын хугацаанд уг газарт олгосон барилга барих зөвшөөрлийг Захиргааны ерөнхий хуулийн 96.1-д заасны дагуу түр зогсоох.
• Улсын хамгаалалтад авах асуудлыг шийдвэрлэх: Богд хааны зуны ордныг Соёлын өвийг хамгаалах тухай хуулийн дагуу улсын хамгаалалтын зэрэглэлд оруулах асуудлыг Засгийн газраар хэлэлцүүлж, шийдвэр гаргуулах.
• Барилгын өндрийн хязгаар тогтоох: Хүрэн ордны архитектур, түүхийн дурсгалын харагдах байдлыг алдагдуулахгүй байхын тулд эргэн тойронд баригдах барилга байгууламжид өндрийн хязгаар тогтоох.
• Хамгаалалтын бүсийг бүрэн тогтоох: Соёлын өвийн хамгаалалт, сэргээн засварлалт, хамгаалалтын бүсийн тогтоолтод нарийвчилсан хяналт, үнэлгээ хийж, хамгаалалтын бүсийг бүрэн тогтоох.
• Түүх, соёлын дурсгалт газрын унаган төрх, язгуур чанарыг алдагдуулахгүй хадгалах нь улс орны тусгаар тогтнол, соёлын дархлааны чухал илэрхийлэл гэдгийг Ерөнхий сайд онцоллоо.