АНУ визийн хугацаа хэтрүүлэн оршин суух зөрчлийг бууруулах зорилгоор зарим төрлийн жуулчны болон бизнесийн ангиллын виз мэдүүлэгчдээс 15 мянган ам.долларын барьцаа шаардах туршилтын хөтөлбөрийг энэ сарын 20-ны өдрөөс эхлүүлэн хэрэгжүүлэхээр болжээ.

Энэхүү туршилт 12 сарын хугацаанд үргэлжлэх бөгөөд АНУ-ын статистик мэдээлэлд үндэслэн визийн хугацаа хэтрүүлэх магадлал өндөртэй гэж тооцогдсон улс орнуудын иргэдэд хамаарах юм. Барьцааны мөнгө нь В1 (бизнес) болон В2 (жуулчин) ангиллын виз мэдүүлэгчдэд хамаарах бөгөөд визийн хугацаагаа зөрчөөгүй тохиолдолд буцаан олгох журамтай байна. Уг бодлого нь АНУ-ын Ерөнхийлөгч асан Дональд Трампын засаг захиргааны хууль бус болон хэт их цагаачлалын эсрэг хэрэгжүүлж буй цуврал арга хэмжээний нэг хэсэг ажээ. Цагаачлалын бодлогоо чангатгах хүрээнд АНУ энэ онд нэр заасан 12 орны иргэдийг тус улсад зорчихыг хориглосон бол ирэх аравдугаар сарын 1-нээс зөвшөөрөлгүйгээр нэвтэрч буй иргэдээс 250 ам.долларын хураамж авах шинэ журам мөрдөгдөх юм байна.

Харин 15 мянган ам.долларын барьцаатай визийн туршилтыг АНУ-ын Дотоод аюулгүй байдлын яамны 2023 оны хил нэвтрэлтийн болон оршин суух бүртгэлийн тайланд тулгуурлан хэрэгжүүлэхээр төлөвлөжээ.