Meta компанийн зүгээс Instagram платформ дээр шууд бичлэг хийхэд тавигдах шаардлагыг шинэчилж, хамгийн багадаа 1.000 дагагчтай, олон нийтэд нээлттэй хаягтай байх зохицуулалт хэрэгжүүлж эхэлжээ.

Шинэ журам нь платформын зардлыг бууруулах, дата дамжуулалтыг оновчтой болгох зорилготой бөгөөд үүгээрээ TikTok платформын жишээг дагаж буй юм. TikTok дээр ч мөн адил шууд бичлэг хийхийн тулд 1,000 дагагчтай байх шаардлагатай. Харин Facebook дээр шууд дамжуулалт хийхэд одоогоор шалгуур тавигдаагүй бол YouTube платформ 50 дагагчийн босго тогтоосон байдаг.

Судалгаагаар нэг сая хэрэглэгч өдөрт дунджаар арван  минутын турш шууд дамжуулт хийхэд 100-150 терабайт (ТБ) хэмжээний дата дамжуулалт шаардлагатай байдаг аж. Харин ийм хэмжээний шууд дамжуулалтыг дэмжихэд платформууд:

Серверийн ашиглалт,

Дата дамжуулалт,

Видео боловсруулалт,

Хяналт, мониторинг,

Сүлжээний тогтвортой байдал зэрэгт

өдөрт $23.000–$43.000-ын зардал гаргадаг байна.

Энэхүү зохицуулалт нь Instagram платформын ачааллыг хянахын зэрэгцээ контентын чанарыг сайжруулах, хэрэглэгчдийн идэвхийг бодитой үнэлэх зорилготой гэж Meta-гаас мэдээлжээ.