Хонконгт хүчтэй аадар бороо үргэлжлэн орж буйтай холбоотойгоор Цаг уурын товчоо цаг агаарын аюулын хамгийн өндөр буюу “хар” түвшний сэрэмжлүүлэг гаргалаа. Энэхүү сэрэмжлүүлэг нь тус бүс нутагт цаг агаарын нөхцөл байдал ноцтой хэмжээнд хүрснийг илтгэж байна.

Цаг агаарын энэ нөхцөл байдал нь хотын хэвийн амьдралд ихээхэн нөлөөлөөд байгаа бөгөөд эмнэлэг, сургууль, шүүх, бүртгэлийн газар зэрэг олон нийтийн байгууллагууд түр хугацаагаар үйл ажиллагаагаа зогсоожээ. Хонконгийн Цаг уурын ажиглалтын төвөөс “Хүчтэй аадар борооны улмаас замууд үерт автсан, замын хөдөлгөөнд саатал үүсэж болзошгүй тул иргэдийг аюулгүй газар хоргодохыг зөвлөж байна” хэмээн мэдэгджээ. Мөн Хятадын өмнөд хэсэгт сүүлийн өдрүүдэд үргэлжилсэн үлэмж хэмжээний хур тунадас, үерийн улмаас Гуандун мужид таван хүн амь насаа алдаж, 1300 гаруй аврагч оролцсон өргөн хүрээний эрэн хайх ажиллагаа өрнөж буйг мэдээлсэн байна. Хятадын Цаг уурын албаны мэдээлснээр, Хонконг болон Гуанжоу орчмын нутагт цагт 60-90 мм хур тунадас унаж байгаа бөгөөд энэ нь тухайн бүс нутгийн аадар борооны дээд түвшинд хүрсэн үзүүлэлт юм. Хонконгод жилд дунджаар 2220 мм хур тунадас унадаг бөгөөд энэхүү хур тунадасны талаас илүү хувь нь зургаадугаар сараас наймдугаар сарын хооронд ордог байна. Цаг агаарын хүндрэлтэй нөхцөл байдлын улмаас олон нийтийн газрууд үйл ажиллагаагаа хязгаарлаж буй. Тухайлбал, Хонконгийн алдартай аялал жуулчлалын бүс болох “Диснейленд” парк хязгаарлагдмал хэлбэрээр ажиллаж байгаа аж.