Эрүүл мэндийн сайд Ж.Чинбүрэн өнөөдөр Сэтгэцийн эрүүл мэндийн үндэсний төвийн үйл ажиллагаатай холбоотой ноцтой зөрчлүүд, шалгалтын дүнгийн талаар мэдээлэл хийлээ.

Тэрбээр "2024 оны арваннэгдүгээр сард иргэн АТГ-т гомдол гаргасны дагуу СЭМҮТ-ийн төлбөртэй үйлчилгээтэй холбоотой асуудлыг Эрүүл мэндийн яам болон Цагдаагийн ерөнхий газар хамтран 2025 оны хоёрдугаар сарын 25-наас гуравдугаар сарын 24-нийг хүртэл шалгасан. Шалгалтаар дараах ноцтой зөрчлүүд илэрсэн. Төлбөртэй тусламж авсан иргэдэд баримт олгохгүй, төлбөрөө эрүүл мэндийн байгууллагын дансанд бус, бусад хувийн данс руу шилжүүлэхийг шаардаж байсан нь тогтоогдсон. Мөн 2022-2024 онд цахим бүртгэлд орсон 527.9 сая төгрөгийн орлогоос 478.9 сая төгрөгийг “иргэн цагтаа ирээгүй”, “эмнэлэгт хэвтээгүй” гэх шалтгаанаар цуцалсан боловч энэ мөнгийг эмнэлгийн удирдлагууд дотоод ажилтнуудтай хуйвалдан бэлнээр гаргаж авсан, хувийн данс руу шилжүүлсэн нь тогтоогдож, эрүүгийн хэрэг үүсгэн шалгаж байна. 2025 оны дөрөвдүгээр сард СЭМҮТ-д "Эрүүл монгол хүн" арга хэмжээнд зориулан 1.3 тэрбум төгрөгийн санхүүжилт шилжсэн ч нарийвчилсан төлөвлөгөө, төсөв батлалгүйгээр “Сэтгэц нийгмийн сэргээн засах төв”-ийн нэрийн дор 14 гэрээт ажилтан авч, нийт 70 сая төгрөгийн цалин олгосон тогтоогдсон. Гэвч эдгээр ажилтнуудын дунд сэтгэцийн эмч, сувилагчаас гадна зам гүүрний техникч, орчуулагч зэрэг мэргэжлийн шаардлага хангаагүй хүмүүс байсан бөгөөд тэдэнтэй санхүүжилтийн эрх олгохоос өмнө гэрээ байгуулсан нь илэрсэн. 2025 оны зургадугаар сарын 12-нд санхүүжилтийн эрхийг хүчингүй болгосон ч түүнээс хойш 248 сая төгрөгийн 40 гүйлгээ гарсан байна. Эрүүл мэндийн сайдын тушаалаар батлагдсан СЭМҮТ-ийн албан ёсны бүтцэд “Сэтгэц нийгмийн сэргээн засах төв” гэх нэгж байхгүй байхад түүгээр нэр барин ажилтнууд авч, төсвөөс хөрөнгө зарцуулсан нь тогтоогдсон. Сэтгэц нийгмийн сэргээн засах төвийн үйл ажиллагаа явуулахад зориулж ажлын байр түрээслэх 82.5 сая төгрөгийг худалдан авах ажиллагаанд 2025 6-7 сард гурван удаа зарцуулсан ба тендер шалгаруулахаас өмнө буюу тавдугаар сард иргэн З-тэй үл хөдлөх хөрөнгө түрээслэх гэрээ хийсэн. Гэрээг СЭМҮТ-ийг төлөөлж хуулийн зөвлөх, хүний нөөцийн ажилтан О Гэгч байгуулсан. Тус төвд тухайн ажилтан байхгүй. Төвийн удирдлагын болон санхүүгийн үйл ажиллагаатай холбоотой дараах зөрчлүүд илэрсэн. Зарим албан тушаалтныг сонгон шалгаруулалгүйгээр албан тушаалд томилсон байна. Тухайлбал удирдлагын түвшний ес нь гишүүний таван албан тушаалын тодорхойлсон шаардлагыг хангахгүй, хоёр нь хувийн хэргээ бүрдүүлээгүй тул шаардлага хангаж байгаа эсэхийг баталгаажуулах боломжгүй. Удирдлагын түвшний ажилчдад хүндийн нэмэгдэл, ур чадварын нэмэгдэл зэрэг 24.9 сая төгрөг хууль бус нэмэгдлийг 2025 оны эхний хагас жилийн байдлаар олгожээ. 2024-2025 оны эхний хагас жилийн байдлаар эмнэлгийн нас баралтын 20 хувьд оношны зөрүү гарсан. Төвийн хэмжээнд удаан хугацаагаар хэвтэн эмчлүүлж байгаа үйлчлүүлэгчийн аюулгүй байдал, хүний эрхийг ноцтойгоор зөрчих тохиолдол их байгаа. Энэ талаар хүний эрхийн комисс мэдүүлэг өгсөн. Эдгээр зөрчлүүд нь зөвхөн нэг удаагийн үйлдэл бус, таван жилээс дээш хугацаанд давтагдан үргэлжилж байгаа үйл ажиллагаа” гэв.