Сэлэнгэ аймгийн Ерөө сумын “Бөхлөө” гэх газар долоодугаар сарын 20-нд хиймэл дагуулын дулааны цэг илрүүлэх системээр бүртгэгдсэн ойн түймрийг энэ сарын 3-ны өглөөний 08:00 цагт бүрэн унтраажээ.

Галын голомтод мэргэжлийн байгууллагууд ажиллаж, түймрийн тархалтыг зогсоон, бүрэн цурамд оруулсан байна. Мөн Сэлэнгэ аймгийн Хүдэр сумын нутагт хоёр ч түймэр гарсан бөгөөд тус сумын “Ард түмний ам” гэх газарт гарсан түймрийг 2025 оны наймдугаар сарын 2-ны 17:20 цагт, “Зэрлэгийн ам” гэх газарт гарсан ойн түймрийг 19:00 цагт цурамд оруулсан талаар холбогдох албанаас мэдээллээ. Түүнчлэн Ховд аймгийн Үенч сумын “Баян салааны зуухт” гэх газарт гарсан ой, хээрийн хосолмол түймрийг мөн өдөр 16:50 цагт цурамд оруулж, бүрэн унтраахаар ажиллаж байгаа аж. Ой, хээрийн түймрийн голомтуудад Онцгой байдлын ерөнхий газар, орон нутгийн Засаг даргын Тамгын газар, байгаль хамгаалагчид болон сайн дурын иргэд хамтран ажиллаж, галын голомтыг богино хугацаанд хяналтдаа авчээ.