Сэлэнгэ аймгийн Зүүнбүрэн сум болон Богдхан ууланд хээрийн түймэр гарсан. Түймрийн үеэр Онцгой байдлынхныг нисдэг тэргээ ашигласангүй гэх шүүмжлэл гарсан. Учир нь, Хойд бүсийн зөвлөлийн анхдугаар хуралдааны үеэр Онцгой байдлын Ерөнхий газрын нисдэг тэргийг сайдууд хөлөглөж явсан гэх мэдээлэл бий. Энэ талаар Онцгой байдлын Ерөнхий газрын Хэвлэл мэдээллийн төвийн мэргэжилтнээс тодрууллаа. Тэрбээр “Онцгой байдлын Ерөнхий газрын нисдэг тэргийг зөвхөн гал түймэр унтраахад ашиглана гэсэн ойлголт байхгүй. Нисдэг тэрэг байхгүй байснаас түймэр гарсан юм шиг ойлголт олон нийтийн дунд гараад байна. Нисдэг тэргүүд түймэр унтраахад ашиглах зориулалттай биш. Ус зөөх, даах хүчин чадалгүй. Шаардлагатай нөхцөлд буюу бэртэж, гэмтсэн хүн аврахын тулд  нисдэг. Нисдэг тэргийг хэдэн төгрөгөөр, яаж түрээсэлдгийг мэдэхгүй байна” гэсэн юм.