“Эрдэм транс” ХХК-ийн захирал Я.Эрдэмбилэгийг мөнгө угаах, залилах, хуурамч бичиг баримт үйлдсэн гэх үндэслэлээр хууль хяналтын байгууллагаас шалгаж байсан. Харин тэрбээр хууль хяналтын байгууллагад шалгагдаж байх үедээ зугтаж, сураггүй болсон байдаг. Тиймээс цагдаагийн байгууллагаас түүнийг өнгөрсөн оны арваннэгдүгээр сараас эрэн сурвалжилж эхэлсэн ч өнөөдрийг хүртэл олоогүй байна. Энэ талаар “Эрдэм транс” ХХК-ийн ажилтнаас тодруулахад “Бид захиралтайгаа холбогдож чадахгүй удаж байгаа. Олон нийтийн сүлжээгээр захирлыг минь шалгагдаж байх үедээ зугтсан гэх мэдээлэл цацагдсан. Бид үнэн эсэхийг нь мэдэхгүй байна” гэв.           

     Хэргийг эргэн сануулбал, “Эрдэм транс” ХХК-ны захирал Я.Эрдэмбилэг, гүйцэтгэх захирал Д.Хатанбаатар нарыг парк шинэчлэлээр оруулж ирсэн автобусныхаа арлын дугаар, үйлдвэрлэсэн оныг сольж, хуурамчаар бичиг баримт бүрдүүлсэн гэх хэрэгт сэжиглэн шалгасан байгаа талаар бид өмнө нь мэдээлж байсан билээ. Улмаар өнгөрсөн оны есдүгээр сарын 12-ны өдөр ЭЦА-наас тэдний албан өрөөнд нэгжлэг хийсэн байдаг.