Баруун аймгуудын нутгаар хүйтний эрч чангарч, цасан шуурга шуурна хэмээн Цаг уур, орчны шинжилгээний газраас малчид, ард иргэдэд анхааруулсан. Одоогийн байдлаар Ховд аймгийн хэмжээнд цаг агаарын нөхцөл байдал ямар байгаа талаар тус аймгийн Цаг уур, орчны шинжилгээний төвийн урьдчилсан мэдээллийн инженер Г.Батцэцэгээс тодрууллаа. Тэрбээр “Өнөөдрийн 10:00 цагийн байдлаар Ховд аймгийн Буянт, Үенч суманд цас орж байна. Өдөртөө Алтай, Буянт, Үенч суманд болон уулархаг нутгаар цас үргэлжлэн орох төлөвтэй байна. Салхины хурд 2-21 метр, уулархаг хэсгээр 12-31 метр хүрч, шороон шуурга шуурч байна. Маргаашнаас агаарын температур 10-15 хэмээр нэмэгдэж, хүйтний эрч эрс чангарна” гэв.