БЭРТЭЭГҮЙ ГАРААРАА ЦАСАА УХАЖ, ЦАСАН ДОРООС БОСОХ ГЭЖ ЗҮТГЭЖ БАЙГААД АМЬД ГАРСАН

   Баян-Өлгий аймгийн Дэлүүн сумын Хүйтэн буйр багийн Төгрөг хэмээх газар тус сумын харьяат хоёр малчин малдаа явж байгаад цасны нурангид өртөж, цасанд дарагдсан тухай дуудлага энэ сарын 12-нд Онцгой байдлын газар бүртгэгдсэн байдаг. Одоогоор цасанд дарагдсан  26 настай малчин А-г эрэн хайх ажиллагааг үргэлжүүлж байгаа аж. Харин ослоос эсэн мэнд гарч, эмнэлэгт хүргэгдсэн К.Хурматтай холбогдож, ослын үед чухам юу болсон талаар тодруулсан юм.

-Та хоёрт гэнэтийн осол тохиолдож, одоогоор хамт явсан ахыг нь олоогүй байна. Тухайн үед юу болсон талаар ярьж өгч болох уу?

    -Би хамаатныхаа дүүтэй хоёулаа осол болсон Төгрөг уулаас таван километрийн зайд оторын гэртэй хоёулхнаа байсан юм. Осол болдог өдөр буюу энэ сарын 12-нд манай суманд хүйтэн салхитай, цасан шуургатай байсан. Цаг агаар таагүй байсан учир ууланд байсан үхрээ ойртуулахаар Төгрөг уул руу авирч байтал гэнэт цас нурж, нэг мэдэхэд цасанд даруулчихсан байсан. Зөвхөн толгойн орой л цасанд даруулаагүй. Нүд, ам хөнгөн дарагдсан байсан тулдаа амьд гарсан гэж бодож байгаа. Осол болдог өдөр хүйтэн, салхитай байсан учир цас юунаас болж нурсныг мэдэхгүй. Хэрвээ дулаан байсан бол хайлж, гэсээд нурсан гэх сэн.

-Ослын улмаас та бэртэж гэмтсэн үү. Одоогоор биеийнх нь байдал ямар байна вэ?

   -Баруун гар болон эгэмний яс хугарсан. Мөн нэг хөлийн зөөлөн эд гэмтсэн учир хөдлөхөд бэрх байсан. Тиймээс бэртээгүй гараараа цасаа ухаж, цасан дороос босох гэж зүтгэж байгаад арай хийж, цаснаас гарсан. Гарсан даруйдаа хамт явсан ахыг хайж, нэрээр нь дуудтал ямар ч хариу дугараагүй. Хэсэг ойр, орчимдоо хайсан. Хөл, гар гэмтсэн байсан учир зоргоороо алхаж, цасан дунд явж чадаагүй. Бас тэр үед маш их айж, сандарсан байсан учир гэртээ очиж, хүмүүст дуулгахаар яаравчилсан. Маргааш /өнөөдөр/ эгэмнийхээ ясыг хадуулна. Хөл, гар хөлдөөгүй болохоор биеийн байдал давгүй байна. Дэлүүн сумынхаа эмнэлэгт нэг хонож эмчлүүлээд одоо аймгийнхаа Нэгдсэн эмнэлэгт эмчлүүлж байна.

-Осол болсон газар танайхаас хэдэн километрын зайтай вэ?

     -Осол болсон газар манайхаас таван километр орчим зайтай. Гэртээ очоод утсаар ярих гэтэл сүлжээ байгаагүй. Тэр өдөр салхи, шуургатай байсан учир гар утасны сүлжээ уначихсан байсан. Тэгэхээр нь 30-аад километрийн зайтай айлд явган очиж, таньж мэдэх хүмүүсдээ хэл дуулгасан. Тэд сумын Онцгой байдлын газарт мэдэгдэж, эрлийн ажиллагааг эхлүүлсэн боловч одоог хүртэл ахыг минь олоогүй байгаа. Мөн орон нутгийн иргэд сайн дураараа эрлийн ажиллагаанд оролцож, ахыг минь хайлцаж байгаа. 

К.Хурмат монголоор ярьж чаддаггүй учир эмчээр нь дамжуулж цөөн хором ярилцсан юм.

100 ГАРУЙ ХҮНИЙ БҮРЭЛДЭХҮҮНТЭЙ ЭРЛИЙН БАГ ЦАСАН НУРАНГИД ДАРАГДСАН 26 НАСТАЙ ЭРЭГТЭЙГ ХАЙЖ БАЙНА

  Мөн эрлийн ажиллагаа хэрхэн үргэлжилж байгаа талаар Дэлүүн сумын Засаг даргын Тамгын газрын даргаас тодруулсан юм. Тэрбээр “Малдаа явж байгаад цасан нурангид дарагдаж, сураггүй болсон малчинг эрэн хайх ажиллагаа үргэлжилж байгаа. Сум, аймгийн Онцгой байдлын алба хаагчдаас гадна нутгийн 60 орчим иргэн эрлийн ажиллагаанд оролцож, нийт 100 гаруй хүний бүрэлдэхүүнтэй эрэн хайх ажиллагааг үргэлжлүүлж байгаа. Өнөөдөр аймгийн Онцгой байдлын газраас нэмэлт хүч дуудаж, техник хэрэгслийг нэмж, эрлийн ажиллагааг өргөн хүрээнд хийхээр төлөвлөсөн. Цасан нурангид дарагдаж, сураггүй болсон иргэн гэрээсээ таван километрийн зайд малдаа явж байсан. Харин нурангинаас эсэн мэнд гарсан 29 настай эрэгтэйг аймгийн нэгдсэн эмнэлэгт хүргэж, эмчилж байгаа” гэсэн юм. 

ЦАСАН НУРАНГИТАЙ ТААРСАН ҮЕД АВАХ АРГА ХЭМЖЭЭ:

-Та нуранги замаас хажуу тийш гарахыг хичээх хэрэгтэй.

-Хэрэв та унаад чирэгдсэн бол ямар ч хамаагүй гадаргуу дээр үлдэхийг хичээ. Сэлж байгаа юм шиг гараа хөдөлгөх.

-Цасан нуралт удааширвал та ам, хамараа гараараа таглаж, амьсгалах нүх гаргах хэрэгтэй.