Галын улмаас дахиад л гурван албан хаагч амиа алдсан харамсалтай хэрэг гарлаа. Оны өмнө хорь гаруйхан настай цэл залуухан албан хаагч орон сууцанд гарсан галыг унтрааж, иргэдийг аврахаар очоод амиа алдсан. Сургуулиа төгсөж ирээд удаагүй, эд ажиллах гэж байсан залуу аврагч дэндүү хайран байсан. Тэр халаглал хүн бүрээс гараагүй байхад л араас нь ийн гурван ч залуу албан хаагч мөн л ажлаа хийж яваад амь эрсэдлээ.

             Онцгой байдлын албан хаагч гэдэг хаа нэг газраас дуудлага ирэхэд, “Бид очоод амь эрсэднэ” гэж хойш суудаггүй, ухарддаггүй, тэгж бодох нь бүү хэл дуудлага аваад л түгжрэлтэй хотынхоо замаар галыг амжиж унтраах сан, хүний амь битгий эрсдээсэй гэж бодсоор яаран очиж, шуурхай ажилладаг л улс. Тэд ч мөн тийм нэг итгэл өвөрлөн очоод л аврах ажиллагаа гүйцэтгэж байгаад амиа алдлаа. Хамгийн хэцүү нь “Аав нь, хань нь, хүү нь дуудлагатай боллоо” гэж хэлээд гарахдаа ажлаа хийгээд л орой ороод ирэх юм шиг санаад гарсан байх. Гэсэн ч хүүдээ, охиндоо, ханьдаа, аавдаа, ээждээ аль нь эргэж ирсэнгүй. Байнга л дуудлагатай байдаг, үргэлж л хэн нэгнийг аврахаар явдаг болохоор хэн нь ч амиа алдана чинээ санаагүй байх. Магад “Миний хань болгоомжтой яваарай” гэсэн үгийг л хэлж амжсан болов уу. Бүр амжаагүй ч байж мэднэ.

          Эх сурвалжийн мэдээлж буйгаар 28-30 насны залуус гэсэн. Ид хийж бүтээж, мөрөөдөж, хайрлаж, дурлаж, амьдралын сайн сайхныг мэдрэх оргил ч нас нь. Ингээд бодохоор хэчнээн уйтай, харамсалтай, хайран байна вэ. Зоригт, дайчин, ажилдаа чин халуун хоёргүй сэтгэлээр зүтгэж байгаад амиа алдсан албан хаагчдад болон ар гэр, төрөл төрөгсдөд нь гүн эмгэнэл илэрхийлье.