Монгол Улсын Ерөнхий сайд Л.Оюун-Эрдэнэ Холбооны Бүгд Найрамдах Герман Улсад албан ёсны айлчлал хийж байна. Ерөнхий сайдын айлчлалын баг өчигдөр Монголоос хөдөлсөн билээ. Тэгвэл Ерөнхий сайд Германы Франкфурт хотод буух онгоцны нислэгийг цуцалж, Берлин хотод буулгасан гэх мэдээлэл цацагдлаа. Нислэгийн хуваарь өөрчлөгдсөнийг зарим зорчигч мэдээгүй учир дамжих суух онгоцноосоо хоцорсон гэх мэдээлэл, бичлэг цахим сүлжээнд цацагдаад байна. Тодруулбал, Улаанбаатар- Германы Франкфуртын чиглэлд нисэх байсан онгоц нислэгээ өөрчилж, Берлин хотод Ерөнхий сайд Л.Оюун-Эрдэнийн айлчлалын багийнхныг буулгасан гэх. 

     Энэ талаар ЗГХЭГ-ын Цахим мэдээллийн хэлтсийн дарга О.Баярмаагаас тодрууллаа. Тэрбээр “Ерөнхий сайд Л.Оюун.-Эрдэнэ албан ёсны айлчлал хийж байгаа. Энэ үед “МИАТ” ТӨҮК болон Гадаад харилцааны яамныхан ярилцаж байгаад Берлинд буух боломжтой болохоор онгоцыг нь буулгасан байх. Хэрэв нислэгийн хуваарь өөрчлөгдсөн бол нислэгээс өмнө зорчигчдод мэдэгдсэн байх ёстой. Энэ талаарх дэлгэрэнгүй мэдээллийг “МИАТ” ХХК-ийнхан өгнө” гэлээ.