УИХ-аар 2023 оны “Улсын төсвийг”-ийг хэлэлцэх гэж буйтай холбогдуулан Монголын үйлдвэрчний эвлэлийн холбооноос  байр сууриа илэрхийллээ.          

       Энэ үеэр МҮЭХ-ны ерөнхийлөгч С.Эрдэнэбат “Иргэдийн худалдан авах чадвар өнгөрсөн хоёр жилд 30 хувь буурсан. Монголчуудын дундаж цалин 450 орчим доллар байсан бол ханш өссөнөөр 400 доллар болж буурч байгаа юм. Тиймээс цалин хөлсийг бодитоор нэмэх хэрэгтэй гэж үзэж байна. Ингэхдээ өнгөрсөн хоёр жилийн хугацааны 30 хувийн худалдан авах чадварын уналт дээр ирэх оны инфляцыг нэмэн тохируулга хийх хэрэгтэй. Иргэдийн цалинг 40 хувь нэмбэл худалдан авах чадвар нь хэвээрээ үлдэнэ. Гэхдээ МҮЭХ-ны зүгээс цалин хөлсийг дор хаяж 50-аас доошгүй хувиар нэмэх шаардлагатай гэж үзэж байна.

“Төсвийн төсөл 2023”-т 250 орчим тэрбум төгрөгийн цалин хөлс нэмэгдэх талаар туссан байна. Энэ нь шинээр бий болсон сургууль, цэцэрлэгт нэмэлт орон тоо гаргаснаас үүдэлтэй нэмэгдэл юм. Намуудын мөрийн хөтөлбөрт цалин хөлсийг инфляцын түвшингээс доошгүй хэмжээгээр нэмэх тухай туссан. Тэгвэл үүнийгээ хэрэгжүүлэхийг шаардаж, санал бичгийг хүргүүлнэ.

Монгол Улсын хөдөлмөрийн үнэлэмж бага байгаатай холбогдуулаад хүний нөөцийн гарах урсгал маш эрчимжлээ. Үндэсний аюулгүй байдлын асуудал хөндөгдөх хэмжээнд хүрлээ. Төрийн албан хаагч, эмч, багш нар зуны амралтаараа гадаадад ажиллаад Монголд бүтэн жил ажиллаад ч хуримтлуулж чадаагүй мөнгөө олж байна. Хамгийн эрчимтэй дотооддоо ажиллах хүмүүс харь улсад баялаг бүтээж байна. Нэгдүгээр сарын 1-нээс хөдөлмөрийн хөлсний хамгийн доод хэмжээ болох 410 мянган төгрөгийн цалинг 550 мянга болгоно. Хөдөлмөрийн хөлсийг цагийн нэг доллар байхаар тооцъё гэж бид санал дэвшүүлдэг. Бусад улс цагийн 7-8 доллароор цалин өгч байна. Тиймээс манай улсын ажиллах хүч гадаад улсыг зориод байна” гэлээ.