Зүүнбаян-Тавантолгой чиглэлийн төмөр замд гарсан ослын талаар Зам, тээврийн хөгжлийн сайд С.Бямбацогт мэдээлэл өглөө. Тэрбээр “Дорноговь аймгийн Улаанбадрах сумын нутаг дэвсгэрт 00:20 цагт Зүүнбаян өртөөнөөс Ханги мандалын чиглэлд явж байсан вагон замаас гарч осолдсон. Тус осол Зүүнбаян өртөөнөөс 75 км-ын зайтай Хулангийн шанд гэх зөрлөгт болсон байна. Галт тэрэгний цуваанд 17 вагон явсан. Түүний 14 вагон нь төмөр замд ашиглах төмөр, гурав нь төмөр бетон ачиж явсан байна лээ. Тус ачааг Ханги мандалын төмөр замд ашиглах байсан. Урьдчилсан байдлаар галт тэрэгний машинист согтуу байсан учир хурд хэтрүүлж замаас гарсан гэх дүгнэлт гарсан. Галт тэргэнд гурван хүн явсан. Тэдний биеийн байдал гайгүй байгаа" гэв.