Баянзүрх дүүргийн Засаг дарга болон холбогдох алба хэлтэс хичээлийн шинэ жилийн бэлтгэл ажлыг хангах чиглэлээр хуралдаж, тулгамдсан асуудлуудыг шийдвэрлэх, холбогдох яам, мэргэжлийн байгууллагад уламжлах талаар санал солилцлоо.

    Баянзүрх дүүргийн хэмжээнд цэцэрлэгийн насны бүртгэлтэй 35277 хүүхэд амьдардаг. Үүнээс 2021-2022 оны хичээлийн шинэ жилд Баянзүрх дүүргийн 28979 хүүхэд сургуулийн өмнөх боловсрол буюу цэцэрлэгт хамрагджээ. Тэгвэл 2022-2023 оны хичээлийн шинэ жилийн тухайд 35277 хүүхэд бүрэн хамрагдана. Харин харьяалал өөр, түр оршин суудаг 4650 хүүхдийг цэцэрлэгт хамруулахад хүндрэл үүссэн.  Энэ асуудлыг цомцог гэр, түрээсийн байр ашиглах зэргээр зохицуулалт хийж, холбогдох яам хэлтэст яаралтай мэдээлж арга хэмжээ авахуулах үүргийг дүүргийн Засаг дарга Н.Баярмөнх өглөө.
     Тэрбээр “Баянзүрх дүүргийн 43 хорооноос 22 хороонд цэцэрлэгийн хүртээмжийн асуудал бүрэн шийдэгдсэн. Үлдсэн 21 хорооны асуудлыг шийдвэрлэхийн тулд түрээсийн байр ашиглах, цомцог гэрийн тоог нэмэгдүүлэх, боломжит байршилд цэцэрлэгийн зориулалтын барилга худалдаж авах зэрэг ажлыг холбогдох боловсролын яамтай хамтран ажиллаж яаралтай шийдвэрлэх хэрэгтэй. Ингэснээр Баянзүрх дүүргийн бүх хүүхэд багачууд цэцэрлэгт хамрагдаж, үүнийгээ дагаад хандив нэрээр цэцэрлэгт элсүүлэх байдал зогсоно. Мөн хамгийн чухал нь хүүхэд бүрээ цэцэрлэгт хамруулж чадсан эцэг эхчүүд ажил хийх бүрэн боломжтой болох юм. Тиймээс цоожтой хаалганы цаана хүүхдийг үлдээлгүй 2022 оны арванхоёрдугаар сард багтааж дүүргийн бүх хүүхдийг 100 хувь цэцэрлэгт хамруулах ажлыг зохион байгуулах хэрэгтэй” гэсэн юм.

    Цомцог гэр, түрээсийн байр бол энэ хичээлийн шинэ жилдээ түр зохицуулалт хийгдэж буй ажил. Харин цаашид Баянзүрх дүүрэгт шаардлагатай цэцэрлэг, сургуулийг нэмэх ажлыг Баянзүрх дүүргээс зохион байгуулна. Энэ хүрээнд наймдугаар сарын 12-нд Боловсрол, шинжлэх ухааны сайд болон түүний баг хамт олон, Баянзүрх дүүргээс сонгогдсон УИХ-ын гишүүд, НИТХ-ын төлөөлөгч зэрэг хүмүүстэй уулзаж хороо бүрд дор хаяж нэг сургууль, цэцэрлэгтэй болгоход шаардлагатай төсөв, санхүүгийн мэдээллийг өгөхөөр болжээ.