Монгол Улсын Ерөнхийлөгчийн ивээл дор “Хүүхдийн асуудлаар үүрэг хүлээгчдийн үндэсний чуулган”-ыг 2022 оны тавдугаар сард зохион байгуулахтай холбогдуулан Цахим хөгжил, харилцаа холбооны яам болон Харилцаа холбооны зохицуулах хорооноос харилцаа холбоо, мэдээллийн технологийн салбарын хүүхдийн асуудлаар хүлээсэн үүрэг, цаашид хүүхдийн эрх хамгаалах, ээлтэй орчин бүрдүүлэх гарц, шийдэл тодорхойлох хэлэлцүүлгийг “Цахим орчин дахь хүүхэд хамгаалал” сэдвээр 2022 оны дөрөвдүгээр сарын 27-ны өдөр цахимаар зохион байгууллаа.
Хэлэлцүүлэгт үүрэн холбооны үйлчилгээ эрхлэгч тав, интернэтийн үйлчилгээ эрхлэгч 43, телевизийн үйлчилгээ эрхлэгч 15, радиогийн үйлчилгээ эрхлэгч 23, олон сувгийн үйлчилгээ эрхлэгч дөрвөн нийт 74 байгууллагын төлөөлөл оролцсон юм.

    Мөн хэлэлцүүлэгт хүүхэд хамгааллын чиглэлээр үйл ажиллагаа явуулдаг төрийн болон олон улсын байгууллагын 28 төлөөлөл оролцож, цахим болон өргөн нэвтрүүлгийн орчинд хүүхэд хамгааллын талаар хэрхэн ажиллах, цаашид хийж хэрэгжүүлэх ажлын талаар хэлэлцлээ.
Хэлэлцүүлгээс гарсан үр дүн, оролцогчдын саналыг нэгтгэн зөвлөмж болгон тавдугаар сард зохион байгуулагдах “Хүүхдийн асуудлаар үүрэг хүлээгчдийн үндэсний чуулган”-д хүргүүлэхээр боллоо.