Улаанбаатараас Ховд аймаг руу явж байсан автобус Баянхонгор аймгийн Бууцагаан сумын нутаг дэвсгэрт осолджээ. Ослын улмаас хүн нас барсан тухай дуудлага 05:00 цагт Онцгой байдлын албанд иржээ. Дуудлагын дагуу тус аймгийн Онцгой байдлын газрын тус сум дахь Гал түймэр унтраах, аврах 72 дугаар ангийн алба хаагчид 35 км зам туулан очиход Улаанбаатар хотоос Ховд аймгийн Цэцэг сумын чиглэлд 21 зорчигчтой зорчиж явсан автобус онхолдож,  нэг хүн нас барсан байжээ. Энэ талаар Ховд аймгийн Онцгой байдлын газрын даргаас тодруулахад “Манай аймгийн Цэцэг сумын нутаг дэвсгэрт “МоЭнКо” компани нүүрс олборлодог юм билээ. Тус уурхай дээр туслан гүйцэтгэгчээр ажилладаг компаниудын автобус ээлжийн хүмүүсээ тээвэрлэж байгаад Баянхонгор аймгийн Бууцагаан суманд осолдсон. Ослын улмаас зургаан хүний бие хүнд, нэг хүний бие маш хүнд байгаа. Бэртэж, гэмтсэн иргэд Бууцагаан сумын эмнэлэгт хүргэгдсэн” гэв.