Нийслэлийн Замын хөгжлийн газраас авто замын хашлагын асуудлаар өчигдөр мэдээлэл хийсэн. Тус мэдээллийн үеэр Замын Хөгжлийн газрын дарга Г.Баярсайхан “Манайд бродюр солино гэсэн тусдаа ажил байдаггүй. Тухайн зам шинэчлэлийн явцад хамуурсан буюу элэгдсэн хашлагыг л сольдог. Цас хайлуулахад цацдаг бодис бетонон хашлагыг эвдэж, элэгдүүлдэг. Тийм болсныг нь л сольдог бөгөөд солих шаардлагагүйг нь сольдоггүй. Манай улс ихэнхдээ бетонон бродюр хэрэглэдэг. Тэр нь цас хайлуулах бодис, давс цацсантай холбоотойгоор ашиглах хугацаа нь богиносох тохиолдол гардаг" гэж мэдээлсэн.

      Тэгвэл иргэдийн дунд “Хашлага хамуурна” гэж ямар зүйл байдаг бол гэсэн эргэлзээ, шүүмжлэл үүссэн. Энэ дагуу бид Замын хөгжлийн газрын дарга Г.Баярсайханаас тодруулахад “Манай замынхан замын хашлага эвдэрч, үйрч, бутран унахыг хамуурах гэж хэлдэг. Энэ бол манай замынхны хэллэг. Өчигдөр би мэдээлэл өгөх үеэр сандрахдаа хүмүүст ойлгомжгүй байдлаар сурсан хэллэгээрээ хэлчихсэн байна лээ. Цас хайлуулахаар цацдаг бодис замын хашлагыг элэгдүүлж, эвддэг юм. Тэр байдлыг л хамуурах гэдэг” гэсэн хариулт өгсөн юм.