Нийслэлийн Замын хөгжлийн газраас авто замын хашлагын асуудлаар мэдээлэл өглөө.

  Энэ үеэр тус газрын орлогч дарга Г.Баттогтох “ Нарны гүүрний тухайд 40.2 сая ам.долларын өртөгтэй, Хятадын Засгийн газраас Улаанбаатар хотод хэрэгжүүлж байгаа төсөл дээр хоёр удаа зээл авсан. Нэг тэрбумын зээлээс Налайхын зам хэрэгжээд явж байгаа. Харин 500 сая ам.долларын экспортын зээлээс Замын цагдаагийн гүүрэн гарц, Баянзүрх болон Сонсголонгийн гүүр, Яармагийн гүүр гэсэн төсөл арга хэмжээ хэрэгжсэн.

Одоогоор Замын цагдаагийн гүүрээс бусад нь хэрэгжээд дууссан байгаа.

     Нарны замын барилгын ажил эцсийн байдлаар ирэх зургадугаар сарын 30-нд дуусах төлөвлөгөөтэй байгаа. Тэгээд нүхэн гарцаас зүүн тийш сэлбэ гол хүртэл Нарны замд үндсэндээ хоёр талд хучилт хийнэ. Мөн олимпын гудамжын зүүн тал хучигдана. Явган хүний гүүрийн ажил дутуу байгаа. Тавдугаар сарын 19-н гэхэд гүүрний метал хийц ирнэ” гэв. Мөн тэрбээр үргэлжлүүлэн “Нийслэлийн замын сүлжээнд энэ жил бид 38 төсөл арга хэмжээг хэрэгжүүлэхээр төлөвлөж, шинээр 29 төсөл арга хэмжээг мөн төлөвлөсөн байгаа. Томоохон ажлаас нь дурдвал, өнгөрсөн жил ашиглалтад орсон 22-ын товчооны замаас хойш Тахилттай холбосон зам байгаа. Үүнээс Дарханы замтай шууд холбосон таван километр зам баригдана. Мөн хотын төвөө Яармагтай холбосон, дөрвөн том гүүртэй замын ажил эхлүүлнэ. Мөн Шар хадыг, Улиастайтай холбох зэрэг томоохон төсөл хэрэгжинэ” гэв.