Эргэлт.мн мэдээллийн сайт сэтгүүлч, уран бүтээлчдийнхээ бүтээлийг эмхэтгэн “ЭРГЭЛТИЙН НОМЫН САН” цуврал бүтээж, эхний 10 номын нээлтээ өнгөрсөн пүрэв гарагт хийлээ. Энэ үеэр Эргэлт.мн мэдээллийн сайтын Хариуцлагатай редактораар ажиллаж байсан сэтгүүлч, нийтлэлч Э.Эрдэнэцэцэг "Бид-Тэд" номын зохиолчдыг төлөөлж үг хэллээ. 

      Тэрбээр “Би Эргэлт.мн мэдээллийн сайтад Хариуцлагатай редактораар ажиллаж байсан. Эргэлтийн тухай ярихаасаа өмнө Э.Хүрэлбаатар ах, Б.Энхмарт эгч хоёрын тухай, яаж танилцаж байснаа ярьмаар санагдлаа. Одоогоос би 10 жилийн өмнө "Өнөөдөр" сонинд дадлага хийх гэж очиж байлаа. Тэр үед Б.Энхмарт эгчтэй танилцаж байсан юм. Бичиж байгаа зүйлийнхээ сайн, мууг сонсох гэж ажлаасаа Сүхбаатарын талбай хүртэл хамт алхдаг байв. Тэр үед Э.Хүрэлбаатар ах "Өдрийн сонин"-д ажилладаг, тэр хоёр талбай дээр уулзаад цаашаа хамт алхдаг байлаа. Ийм дурсамжууд бидэнд бий. 

       Талийгаач П.Батхуяг багш нэг удаа “Э.Хүрэлбаатар бол хүч, Б.Энхмарт бол ухаан” гэж хэлж байсан юм. Энэ бол хамгийн оновчтой тодорхойлолт юм шиг санагддаг.

       Сэтгүүл зүйгээ гэсэн сэтгэлийн үзүүрээс өнөөдрийн "Эргэлт.мн" болон энэ 10 ном бүтсэн гэдгийг хэлмээр байна. Манай Эргэлтийнхэн редакцаа өөрсдөө засаж, обойгоо наагаад, нойргүй хонож байсан өдрүүд зөндөө байлаа. Гэвч өнөөдөр зарим хүн нь хилийн чанадад, зарим нь өөр аймаг эсвэл ямар нэг ажилтай болоод энд хамт байж чадсангүй. Тэр хүмүүсийг төлөөлөөд би энд үг хэлж байна. Аливаа юмыг хийснийх нь дараа харах эсвэл хэн нэгнийг хийснийг харах амархан юм шиг санагддаг. Эргэлтийн 10 ном амархан бүтээгүй, тэр дундаас "Бид-Тэд" ном бол Эргэлт.мн сайтад ажиллаж байсан хүмүүсийн ажиллаж байх хугацаандаа бичсэн нийтлэл, ярилцлага, сурвалжилгуудаас бүтсэн ном. Эргэлтийнхнийгээ цаашид Монгол Улсын сэтгүүл зүйн түүчээ болж, илүү гэрэлтэж гялалзаарай гэж ерөөе. Тэдэнгүйгээр бид, бидэнгүйгээр тэд гэж байхгүй, төсөөлөхийн аргагүй бүгдэд нь баярлалаа" хэмээн сэтгэлийн үгээ хэлэв.