Эргэлт.мн мэдээллийн сайт сэтгүүлч, уран бүтээлчдийнхээ бүтээлүүдийг эмхэтгэн “ЭРГЭЛТИЙН НОМЫН САН” цуврал бүтээж, эхний 10 номын нээлтээ өнгөрсөн пүрэв гарагт хийлээ. Энэ үеэр сэтгүүлч, зохиолч  Р.Эмүжингээс сэтгэгдлийг нь сонслоо.

   Тэрбээр “Үнэхээр гайхалтай сайхан өдөр байна. Залуу сэтгүүлчид урагшилж, зорьж, урамтай ажиллаж байна. Нийгмийн уур бухимдал, улс төрийн шалтгаантай саад бэрхшээлийг даван туулж чадаж байна. Мэргэжлийн сайтын зүгээс анх удаа арван ном хэвлүүлж, уншигчийн гар дээр тавьж байна. Тэр дундаа сэтгүүл зүйн мэргэжлийн ном гаргана гэдэг бол Монгол Улсад анхны тохиолдол учир миний хувьд өндрөөр үнэлж байна. Энэ цувралыг бүтээхэд ард нь ажилласан хамт олон, залуу сэтгүүлчид, эх бэлтгэгч нарт шинэ бүтээлээ өлгийдөн авсанд нь баяр хүргэе. Шинэ ном гэдэг сайхан зүйл, түүнтэйгээ тэнцүү өгөөжтэй байх хэрэгтэй. Сэтгүүл зүйн мэргэжлийн чиглэлээр сүүлийн үед гарч байгаа хамгийн  даацтай бүтээлүүдийг эмхэтгэн арван ном болон гаргаж байгаа нь нийгэмд тодорхой хэмжээний дуу хоолой болох байх. Сэтгүүл зүйн чиглэлээр сурч байгаа оюутан, залуучуудад гарын авлага болно гэж найдаж байна. Мөн сэтгүүл зүйн салбарыг мэргэжлийн болон мэргэжлийн бус нүдээр олж хардаг болсон энэ нийгэмд тодорхой хэмжээгээр үнэнийг олж харах, үнэлэх боломжийг олгоно гэж харж байна. Эргэлт.мн мэдээллийн сайтын хамт олонд шинэ бүтээлээ өлгийдөн авсанд нь баяр хүргэе” гэв.