Эргэлт.мн мэдээллийн сайт сэтгүүлч, уран бүтээлчдийнхээ шилдгийн шилдэг бүтээлүүдийг эмхэтгэн “ЭРГЭЛТИЙН НОМЫН САН” цуврал нэртэй арван ном бүтээж, номын нээлтээ хийлээ. Энэ үеэр Зариг.мн мэдээллийн сайтын үүсгэн байгуулагч, Ерөнхий эрхлэгч  Н.Өнөрцэцэг  сэтгэгдлээ хуваалцсан юм.

  Тэрбээр “Орчин үед цахим сэтгүүл зүй өргөжиж, хүмүүс гар утсаараа мэдээллийг түргэн шуурхай авч байна. Энэ нь нэг талаараа шуурхай сайн хэрэг. Гэхдээ сэтгүүлзүйн хувьд уншигчид их залхуу болчихсон эгзэгтэй үе гэж болно. Энэ үед Монголын цахим сайтын салбарт уншдаг сонин хэлбэрээр Эргэлт.мн сайтынхан маш амжилттай ажиллаж байгаа. Уншигчид Эргэлтийг сонгон уншиж байна. Ялангуяа Э.Хүрэлбаатар, Б.Энхмарт хоёр сонинд ажиллаж байсан, баримт нотолгоотой сайн ажилладаг сэтгүүлчид. Б.Энхмартын хувьд экологийн сэдвийг сайн хөндөж сурвалжилдаг. Зарим нийтлэлийг нь уншигчид уншаад бараг уйлдаг байх. Миний хувьд Б.Энхмартын үнэнч уншигч, “Нулимстай бөхөн” “Дэндүү үнэнч чи минь” гээд нүдэнд харагдтал гоё бичиж чаддаг. Яг сэтгүүл зүйн үүргээ Эргэлт.мн сайт маш сайн биелүүлж байгаа. Юм уншдаг уншигчдад маш сайн нийтлэл, мэдээг хүргэж байгаа чадварлаг хамт олон гэж боддог. Хийсэн бүтээлээ ном болгоод хэвлүүлсэн нь сайхан санагдаж байна"гэв.