Эргэлт.мн мэдээллийн сайт сэтгүүлч, уран бүтээлчдийнхээ шилдгийн шилдэг бүтээлүүдийг эмхэтгэн “ЭРГЭЛТИЙН НОМЫН САН” цуврал нэртэй арван ном бүтээж, номын нээлтээ хийлээ. Энэ үеэр Монголын сэтгүүлчдийн нэгдсэн эвлэлийн дэд ерөнхийлөгч, МУБИС-ийн НХУС-ийн захирал  Ж.Батбаатар үг хэллээ.

         Тэрбээр “Эргэл.мн мэдээллийн сайтын хувьд маш сайн ажиллаж байгаа. Өнгөрсөн жил шилдэг сайт болсон.  Нийгэм энэ дунд төр засаг бараадсан, мөнгө дагасан янз бүрийн үйл явдал манай хэвлэлийнхэн дунд мэр сэр байгаа. Тэрнээс ангид байж чөлөөт хэвлэлийн байран дээрээ бие даасан чөлөөт хэвлэлийн үүрэг гүйцэтгэж ажилласанд нь  Эргэлт.мн мэдээллийн сайтын хамт олонд талархаж байгаа. Би сүүлийн хорь гаруй жилийн турш Монгол Улсад гарч байгаа хэвлэл мэдээллийн хэрэгслүүд, сэтгүүлчид бүгдийг нь ажил үүргийнхээ хувьд анзаарч, ажиглаж, дүгнэлт хийсэн учир хэн бүхэнд нь хэлэх үг бий. Онцлоход, сүүлийн арван гаруй жил ажиллаж байгаа манай сэтгүүлчдээс  Э.Хүрэлбаатар, Б.Энхмарт нар үеийнхэн дундаа дээд эрэмбийн сэтгүүлчид гэдгийг би бардам хэлж чадна. Манай Э.Хүрэлбаатар бол явдаг сэтгүүлч. Би түүний сонинд ажиллаж байхдаа бичиж байсан олон сурвалжилгыг давтаж уншаад байдаггүй ч тодхон санаж байна. Явдаг сэтгүүлчийн хамгийн гол бичдэг бичлэгийн төрөл бол мэдээж сурвалжилга. Тэр мэргэжлийн түшинд хийдэг, бичдэг. Миний хувьд ажлын шаардлагаар сэтгүүлчдийн шилдэг бүтээлийн олон уралдаан шүүдэг. Заримдаа цаг хэмнэх үүднээс залуучуудаараа сайнуудыг нь ялгуулж, шилдэг 5-6 нь тунаж үлдэхэд Б.Энхмартын бичвэр, нийтлэлүүд байнга орж ирдэг. Салбарын шилдгийг шалгаруулдаг “Балдорж” шагналд энэ хоёр сэтгүүлч олон жил амжилттай оролцсон. “Эргэлтийн номын сан” арван номын талаар дөнгөж сая Б.Ганчимэгтэй хамт бахархаад сууж байлаа. Хоёр жилийн дотор арван боть номтой болно гэдэг бахархмаар зүйл. Би олон сэтгүүлч шавь, нөхдөдөө "Сонин, ном хоёрт цензуртэй хандах хэрэгтэй" гэж хэлдэг. “Эргэлтийн номын сан” миний боддог шиг шалгуур, баримтлал, төрөл зүйлээр нь ялгасан сайн бүтээл болжээ. Энэ ном сурвалжилга, өгүүлэл, ярилцлага, хөрөг гээд сэтгүүл зүйгээр хийж байгаа номд тавигдах шаардлагын хамгийн эхний шалгууруудыг хангаж байна. Ном гэдэг гайхалтай, үнэхээр сайхан зүйл гэдгийг давтаж хэлээд, цаашдын ажилд нь амжилт хүсье”гэв.