Жүжигчин Э.Тодгэрэлийн төрсөн өдөр өнөөдөр тохиож байна. Тэрбээр УДЭТ-т ажиллаж байх хугацаанд тайзны олон бүтээлийн туслах болон гол дүрд тоглосон. Харин дэлгэцийн уран бүтээлд бол “Бид гурвын болзоо”, “Сүнс”, “Хийморь”, “Яллагч”, “Нүдээ аниад төсөөл”, “Намайг хайрла” зэрэг уран бүтээлийн гол болон туслах дүрд тоглосон залуу уран бүтээлч.

   Сонин содон, эерэг, эсрэг аль ч дүрийг торохгүй даваад гардаг гэмээр жүжигчин бол тэр яах аргагүй мөн.Тэрбээр хэвлэлд өгсөн нэгэн ярилцлагадаа “Жүжигчин мэргэжлийг эзэмшсэн болохоор янз бүрийн дүрд тоглоно гэж боддог. Драмын театрт дөнгөж ороод  УДЭТ-ийн дэргэдэх Театр студийн дагалдан жүжигчин байлаа.Тэр үед долоон найруулагчийн төсөл орж ирэхэд Ч.Найдандорж найруулагч “Чөлөөт хос” жүжигтээ намайг намайг гол дүрд авч, ажиллуулсан юм” хэмээн хамгийн анх сургуулиа төгсөөд урлагт хөл тавьж байсан түүхээ ярьсан байдаг.

 Түүний УДЭТ-ын тайзнаа тоглосон жүжгийн дүрээс онцлог нэгэн дүр бол “Ромео, Жульетта” жүжгийн Меркуциогийн дүр. Тэрбээр “Меркуцио бол чин шударга , үнэнч дайчин, эрэлхэг зоригтой, биет юмаар зүйрлэвэл иртэй шөвөг, хутга, мэс, хурдан сум, ирвэс шиг хүн” хэмээн тодорхойлсон байдаг. Тодоо өөрөө амьдрал дээрээ яг Меркуцио шиг хөдөлгөөнтэй, шаламгай, аль дүр, аль киноны хэсэгт асаж, цөмөрч, цойлдог уран бүтээлч. Түүнд залуу уран бүтээлчийн галтай зан чанар байдаг. Түүгээрээ өөрийгөө өрдөөж, асааж, тэр хэрээр асаж, цоролздог галтай дүрээрээ үзэгчдэд хүрч, түүнийг бас нэг тийм дүрээр хүлээдэг.

   Тэр өөрөө ч үзэгчиддээ бэлэг барихаар “Риакшн” продакшныг, залуу жүжигчин Х.Цасчихэртэй хамтран байгуулж, хамгийн анхны “Сүнс” нэртэй киногоо үзэгчидэд хүргэхээр зэхэж байгаа юм. Түүнд төрсөн өдрийн мэнд хүргэхийн сацуу тун удахгүй нээлтээ хийх гэж байгаа будаг нь ханхалсан шинэхэн кинонд нь амжилт хүсье. Үзэгчдийн хүлээлтийг давуулсан олон уран бүтээлийн эзэн байхыг хүсэн ерөөе.