Оюутан цэргийн онолын сургалт эхэлсэнтэй холбоотой өнөөдөр  Батлан хамгаалахын  сайд Г.Сайханбаяр, Боловсрол, шинжлэх ухааны сайд Л.Энх-Амгалан нар сургалтын явцтай  танилцжээ.

 

 

   Энэ үеэр Батлан хамгаалахын сайд Г.Сайханбаяр "Батлан хамгаалах яам, зэвсэгт хүчин бол Монгол улсын тусгаар тогтнол аюулгүй байдлыг гаднын зэвсэгт халдлага түрэмгийллээс хамгаалах үүргийг хүлээж байдаг. Тийм учраас Монгол улсын бүх иргэнийг батлан хамгаалах бэлтгэлжилттэй болгох үүрэг БХЯ-нд ногддог. Үүний нэг нь "Оюутан цэрэг" хөтөлбөр юм. Ковид цар тахлын улмаас хоёр жил тасалдсан учраас "Оюутан цэрэг" хөтөлбөр нийгмийн маш их хүлээлттэй байна. МӨн маш өндөр эрчимжсэн сургалтаар та бүхэн хоёр сарын танхим, хоёр сарын бэлтгэл сургуульд хамрагдана. Хэдийгээр 12 сарын хугацаанд цэргийн албыг хаах ёстой боловч оюутан залуус дундаас сор нь болж шигшигдэж ирсэн та бүхэн богино хугацааны эрчимжсэн сургалтыг даах бүрэн бололцоотой гэдэгт итгэлтэй байна. Өнөөдрийг хүртэл 5200 гаруй залуус энэ албаар дамжаад байна. Залуусын хандлага маш их өөрчлөгддөг. Өглөө эрт босохоос авахуулаад асуудалд хариуцлагатай хууль журам гэдгийг ойлгож мэддэг. Нэг насандаа мартахгүй сайхан нөхөрлөлийг цэргийн албаар л хүн олж авдаг юм шүү. Олон мянган залуучуудаас шигшигдэж ирсэн учраас та бүхэн сургуульдаа,  цэргийн албандаа хариуцлагатай байж ард нь гарах хэрэгтэй гэдгийг та бүхэнд захимаар байна" гэв.

 

    Харин Боловсрол, шинжлэх ухааны сайд Л.Энх-Амгалан "Та бүхнийг хараад бахархах сэтгэл төрж байна. Эх орноо хамгаалж, цэргийн алба хаана гэдэг бол монгол хүн болж төрсний хамгийн том бахархал, гавьяа гэж боддог. Оюутан цэргийн бүртгэл эхлэхэд маш их хүсэлт ирсэн. Оюутан цэрэгт хамрагдах хүсэл зорилготой байна гэдэг сайхан. Монгол Улсад 30 мянган оюутан байдгаас 18 мянга нь эрэгтэй. Үүний 4000 мянга нь тус хөтөлбөрт хамрагдах хүсэлт илгээнэ гэдэг үндсэндээ дөрвөн оюутан тутмын нэг нь тус хөтөлбөрт хамрагдаж байна.  Төгсөгчдөөс ажил олгогчид оюутан цэрэгт хамрагдсан эсэхийг түрүүлж хардаг. Охид хүртэл оюутан цэрэгт явсан залуусыг крашлдаг болсон байна. Хөдөлмөрийн зах зээлийн өнгөрсөн оны судалгаанаас харахад ажил олгогчид онц сурдаг гэхээс илүү төлөвшил, хариуцлагатай, бусадтай нэг баг болж чаддаг, бусдыгаа сонсдог чадварыг төгсөгчдөөс хардаг юм байна. Энэ чадварыг эзэмшсэн хүүхдүүд ажлын байртай болдог сайн жишээ байна.  Цэргийн албаа нэр төртэй хаахыг хүсье" гэлээ.