Санхүүгийн зохицуулах хорооноос 17 даатгалын компани, итгэлцлийн үйлчилгээ эрхлэх тусгай зөвшөөрөлтэй 54 банк бус санхүүгийн байгууллагуудын гүйцэтгэх захирал, төлөөлөн удирдах зөвлөлийн нарийн бичгийн дарга нарт зориулсан сургалт, хэлэлцүүлгийг энэ сарын 12, 13-ны өдрүүдэд зохион байгууллаа.

    Энэ үеэр шинэчлэн баталсан “Компанийн засаглалын кодекс” болон “Даатгагчийн нээлттэй ил тод байдал, засаглалын чиглэлийн асуудлууд”, “Даатгалын хяналт шалгалт, нөхөн төлбөрийн өргөдөл, гомдол”-ын талаар сургалт мэдээлэл өглөө. Мөн итгэлцлийн үйлчилгээ эрхэлж буй банк бус санхүүгийн байгууллагуудын бодлого, зохицуулалт, зайнаас тавих хяналтын хүрээнд анхаарах гол асуудлуудын талаар танилцуулсан юм.

    Цаашилбал засаглалын кодекс, банк бус санхүүгийн байгууллага, даатгалын салбарт тулгамдсан бусад асуудлын талаар хэлэлцүүлэг өрнүүлж, санал солилцлоо. Үүний үр дүнд холбогдох компаниудын эрх бүхий албан тушаалтнууд Санхүүгийн зохицуулах хорооноос хэрэгжүүлж буй үйл ажиллагаа, шинэчлэн батлагдсан засаглалын кодекс, санхүүгийн тайлагналын хугацаа, тоон мэдээлэл, нөхөн төлбөртэй холбоотой өргөдөл гомдол, хууль тогтоомжийн хэрэгжилтийн талаар мэдээлэлтэй боллоо.