12-17 насны хүүхдүүдийн вакцинжуулалтыг түр хугацаагаар зогсоосон талаар Эрүүл мэндийн яамнаас өчигдөр мэдээлэв. Файзер болон Бион Тех үйлдвэрийн Комирнети вакцины татан авалттай холбоотойгоор вакцинжуулалтыг түр зогсоох шийдвэр гаргасан байна.

          Энэ талаар Эрүүл мэндийн яамны Хэвлэл мэдээлэл, олон нийттэй харилцах зөвлөх Б.Ууганбаяраас тодруулахад “Бидний төлөвлөж байснаас өндөр хувьтайгаар хүүхдүүд коронавирусийн эсрэг вакцинд хамрагдаж байна. Иймээс бид вакцины татан авалттай холбоотойгоор 12-17 насны хүүхдэд нэгдүгээр тун тарихыг түр хугацаанд зогсоосон. Одоо байгаа вакцинаа хүүхдүүдэд тарьвал хоёрдугаар тун тасалдах магадлалтай. Тийм учраас нэгдүгээр тундаа хамрагдсан хүүхдүүдэд хоёрдугаар тунг нь хийж, нөөцөө бүрдүүлсний дараа дахин вакцин хийж эхэлнэ. Вакцинд хамрагдсан хүүхдүүдэд вакцины хариу урвал хөнгөн илэрч байгаа. Тухайлбал, халуурах, толгой өвдөх зэрэг хөнгөн хариу урвал илэрч байгаа гэсэн үг” гэлээ.

      Харин ХӨСҮТ-ийн Дархлаажуулалтын албаны дарга О.Дашпагма “Баяр наадмын амралтын өдрүүдэд дархлаажуулалт хийгдэхгүй. Хүүхдүүдэд вакцины хариу урвал хүчтэй илэрч, вакцин зогсоож байгаа гэдэг нь худал мэдээлэл. Баяр наадмын дараагаас дархлаажуулалт хэвийн явагдана” гэлээ.