Үндэсний их баяр наадмыг цахимаар тэмдэглэхээр болсон. Харин аймаг, сумдын наадмыг долдугаар сарын 20-ноос хойш тэмдэглэх эсэхийг Засгийн газраас шийдэх юм. Өнөөдрийн байдлаар гурван аймаг энэ жил наадам тэмдэглэхгүй гэдгээ албан ёсоор зарлаад байна. Тэгвэл үүнтэй холбоотойгоор Завхан аймгийн Засаг дарга наадмын төсвөөрөө эмнэлэгтээ ор, шаардлагатай тоног төхөөрөмж авахаар болжээ. Мөн тэрбээр өнөөдөр аймгийн төсвөөс эмнэлэг, цагдаагийнханд шинэ машин авч өгчээ.  

            Энэ талаар Завхан аймгийн Засаг дарга Д.Түвшинжаргалаас тодрууллаа. Тэрбээр “Би аймгийн Засаг даргаар томилогдохдоо ард иргэдийн эрүүл, аюулгүй байдлын төлөө ажиллаж байгаа эмч, эмнэлгийн ажилтнууд, цагдаагийн алба хаагчдад анхаарч ажиллана гэдгээ хэлсэн. Үүнийхээ хүрээнд аймгийн төсвийн мөнгөөр цагдаагийн алба хаагчдад дөрвөн машин, эмнэлэгт бүрэн тоног төхөөрөмжтэй хоёр машин хүлээлгэж өглөө. Манай аймаг цагдаагийн алба хаагчид 13 жилийн дараа шинэ машинтай боллоо. Манай аймаг наадам зохион байгуулахгүй гэдэг шийдвэр гаргасан. Албан ёсны шийдвэр нь маргааш өглөө албан бичгээр гарна. Цахим сүлжээнд хүмүүс наадмын төсвөөрөө эмнэлэг, цагдаагийн байгууллагад машин авч өгсөн гэж эндүү бичсэн байна лээ. Харин наадам зохион байгуулах 200 гаруй сая төгрөгөөр аймгийн болон сумын эмнэлэгт ор, тоног төхөөрөмж авч өгөхөөр  төлөвлөчихөөд сууж байна” гэлээ.