-Газар хөдлөлтийн чичирхийлэл одоо ч мэдрэгдсээр байна-

Хөвсгөл аймгийн Ханх суманд нэгдүгээр сарын 12-ноос хойш 1500 удаа газар хөдөлжээ. Одоогийн нөхцөл байдлын талаар Ханх сумын ЗДТГ-ын дарга Б.Баасансүрэнгээс тодрууллаа.

-Ханх сумын одоогийн нөхцөл байдлын талаар мэдээлэл өгөхгүй юү?

-Газрын хөдлөлтийн чичирхийлэл иргэдэд одоо хүртэл мэдрэгдсээр байгаа. Ойролцоогоор 2-3 цагийн зайтай 3.5-4 магнитуд хүчтэй чичирхийлэл мэдрэгдэж байна. Манай суманд Одон орон, геофизикийн хүрээлэнгийн ажилтнууд ирж, хоёр хоног ажиллаад явлаа. Албаныхан тодорхой цэгүүдэд станц суурилуулсан. Мэргэжлийн байгууллагын нэгтгэсэн тоогоор нэгдүгээр сарын 12-18-ны хооронд манай суманд 1500 удаа газар хөдөлж, иргэдэд чичирхийлэл мэдрэгдсэн гэсэн.

-Иргэдийн биед ямар нэгэн өөрчлөлт гарсан уу?

-Газар хөдлөлтийн давтамж нэмэгдэх, хасагдах гэдгийг бид мэдэхгүй учраас иргэд байнгын бэлэн байдалд байна. Иргэдэд сэрэмжлүүлэх зөвлөгөө, мэдээллийг өгч байгаа. Мэргэжлийн хүмүүсийн хэлж буйгаар “Нэг сарын дараа газар хөдлөлтийн чичирхийлэл хүний биед мэдэгдэхгүй болно” гэсэн. Зарим хүний толгой нь өвдөх, дотор муухайрах, даралт ихсэх зэрэг биед өөрчлөлт орж, эмнэлгийн байгууллагад хандаж байна. Иймд эрүүл мэндийн байгууллагын ачаалал нэмэгдэх хандлагатай байгаа.

-Хэдий хэр хэмжээний хохирол учирсан бэ?

-Айлуудын шилэн эдлэл, хүнсний дэлгүүрүүдийн хагарсан бараа бүтээгдэхүүний хохирол 10 сая орчим төгрөг байгаа. Хохирлын хэмжээ эцсийн байдлаар гараагүй. Үүнээс гадна малчдын малын хашаа нурж, 6-8 айлын байшин амьдрах аргагүй болсон. Зарим айл нь айлд амьдарч байгаа. Ханх сумын хэмжээнд 35 өрх газар хөдлөлтийн улмаас их, бага  хэмжээгээр хохирол амссан.

-Ийм тохиолдолд сум, орон нутгаас хохирол амссан иргэдэд ямар тусламж үзүүлдэг юм бэ?

-Сумын удирдлагын зүгээс Хөвсгөл аймгийн Онцгой коммист “Манай суманд учирсан хохирлын хэмжээг тогтоож өгнө үү” гэсэн хүсэлт өгсөн. Үүний дагуу аймгийн ИТХ-ын дарга, гамшгийн эрсдэлийг бууруулах орон нутгийн зөвлөлийн дарга Г.Мөнгөнхуягаар ахлуулсан ажлын хэсэг газар дээр нь ирж ажиллаад явлаа.

-Сумын ЗДТГ-ын байр болон бусан төрийн байгууллагын барилгын хана цуурч, тааз нурсан гэсэн шүү дээ. Төрийн албан хаагчид ажлаа  хийж байгаа юу?

-Суманд өөр байр байхгүй учраас ЗДТГ-ын байрандаа бид ажиллаж байгаа. Газар хөдлөлтийн улмаас албан байгууллагууд их хэмжээний хохирол амссан. Мөн газар хөдлөлтийн чичирхийлэл ЗДТГ-ын хоёдугаар давхарт илүү их мэдрэгдэж байна.