Сүхбаатар аймгийн Онгон суманд коронавирусийн батлагдсан тохиолдлын ойрын хавьтал очсон тул хөл хорио тогтоож, тодорхойгүй хугацаагаар "тэг" зогсолт хийжээ. Энэ талаар тус сумын Засаг дарга О.Үнэнбороос тодрууллаа.

-Танай суманд сэжигтэй тохиолдол илэрч, тэг зогсолт хийсэн байна. Энэ талаар мэдээлэл өгнө үү?

 -Өчигдөр буюу нэгдүгээр сарын 7-нд Улаанбаатар хотоос хоёр иргэн манай суманд ирсэн. Тус иргэд нь Баянзүрх дүүрэгт амьдардаг юм билээ. Өнөө өглөө тагнуулын мэдээгээр хоёр иргэний нэгнийх нь эхнэр коронавирусийн халдвартай талаарх мэдээлэл ирээд "тэг" зогсолт хийж, сумаас орох, гарах хөдөлгөөнийг тодорхойгүй хугацаагаар зогсоосон. Түргэвчилсэн оношлуураар шинжилгээний хариу сөрөг гарч, PCR шинжилгээний хариу хүлээж байна.

-Танай сумын иргэд биш юм байна. Ямар зорилгоор очсон юм бол?

-Хүнс тээвэрлэх албаны зөвшөөрөлтэй, PCR шинжилгээний бичигтэй нэвтэрсэн. Ямар зорилгоор ирсэн талаар асуухад “Танай суманд мал, мах бэлдүүлж байсан. Тэрийгээ авах гэж ирсэн” гэсэн. Гэтэл манай суманд мал, мах бэлдэж байсан хүн байхгүй байна.

-Явсан маршрутын хувьд ямар байгаа вэ?

-Өчигдөр 13:00 цагийн үед суманд орж ирээд хүнсний дэлгүүрээр үйлчлүүлсэн байна лээ. Харин хаана хоносон талаар нь асуухад “Машиндаа хоносон” гэж асуумж бөглөсөн. Мөн мал мах авдаг хэд хэдэн ченжтэй уулзсан байна лээ. Явсан маршрут, уулзсан хүмүүсээ тодорхой хэлэхгүй, нууцлаад байна.