Засгийн газрын тогтоолоор цахилгаан, дулаан, ус буюу суурь хэрэглээний үнийг өнгөрсөн сарын 1-нээс долдугаар сарын 1 хүртэл төрөөс даах шийдвэр гаргаад буй. Үүнтэй холбоотойгоор иргэд цахилгааны төлбөр хэт өндөр гарсан гомдол хэлж байна. Бид энэ талаар Баянзүрх дүүргийн X хорооны иргэн В.Барамсайгаас тодрууллаа.

-Танай цахилгааны төлбөр өнгөрсөн арваннэгдүгээр сард хэд гарсан бэ. Мөн арванхоёрдугаар сарын төлбөр хэт өндөр гарсан гэсэн мэдээллийг та өгсөн шүү дээ. Энэ талаараа дэлгэрэнгүй ярихгүй юу?

-Манайх нам даралтын зуухтай. Өдөртөө цахилгаанаар биш, нам даралтаар халаадаг гэсэн үг. Харин шөнөдөө шөнийн хөнгөлөлт эдэлдэг учраас цахилгаанаар халаадаг. Өнгөрсөн арваннэгдүгээр сарын төлбөр 30 мянга гарч, талыг нь шөнийн хөнгөлөлтөөр төлж, 16 мянган төгрөгийн төлбөрийн нэхэмжлэл ирсэн. Гэтэл арванхоёрдугаар сарын 31-нд цахилгааны төлбөр өмнөх төлбөрөөс 10 дахин их буюу 443 мянган төгрөг гарлаа. Өнгөрсөн арваннэгдүгээр сард манайх цахилгаанаар халааж байсан шүү дээ. Гэтэл цахилгаан тэглэсэн гэх сардаа ийм өндөр төлбөр гарчихлаа.

-Арванхоёрдугаар сарын төлбөрөөс төр хэдэн төгрөг төлсөн байна бэ?

-Ирсэн нэхэмжлэл дээр “Засгийн газраас төлсөн төлбөр 51862 төгрөг” гэсэн байна лээ. Мөн шөнийн хөнгөлөлт гэж 109461 хасагдсан байгаа юм. Ингээд манайд төлбөл зохих төлбөр 282007 төгрөг. Гэтэл хаанаас ч юм 16 мянган төгрөг нэмэгдээд 298 мянган төгрөг төлөхөөр болчихоод сууж байна. Уг нь манайх төлбөрийн үлдэгдэлгүй, арваннэгдүгээр сард гарсан 16 мянган төгрөгөө хэдийн төлчихсөн байсан.

-Та цахилгааны байцаагч болон холбогдох албаныханд мэдэгдэж, гомдол гаргасан уу?

-Манай нөхөр 70047004 дугаарын утас руу ярьж, гомдол гаргасан байсан. Ингэхэд анх 350 мянган төгрөг төлөх байсан бол 282 мянга болж буурсан гэсэн. Ийм дураараа үнэ хэлж, бичиж болохгүй шүү дээ. Бид цахилгааны байцаагч дуудаж, манай цахилгааны төлбөр ийм өндөр гарч байгаагүй талаар хэлсэн. Ирж тоолуур харчихаад “Танайх яах аргагүй ийм гарсан байна” гэж хэлээд явсан. Хэрэв үнэхээр ард, иргэдээ хохироох гээгүй л юм бол цахилгаан төлбөр яаж ийм өндөр гараад байгааг ил болгох хэрэгтэй. Цахилгааны төлбөр ингэж өндөр гарвал бид төлбөрөө өөрсдөө төлөөд, хуучнаараа явсан нь дээр.

"Хэрэглэгчид цахилгааны бичилттэй холбоотой асуудлыг төдийлэн ойлгохгүй байна"

Харин өнөөдөр эл асуудалтай холбоотойгоор ШӨХТГ-аас мэдээлэл хийж, иргэдийн гомдол, мэдээллийн дагуу УБЦТС ТӨХК-д шалгалт хийхээр болсон. Дээрх асуудалтай холбоотой УБЦТС ТӨХК-ийн гүйцэтгэх захирал Р.Дагдан “Манай хэрэглэгчид цахилгааны бичилттэй холбоотой асуудлыг төдийлэн ойлгохгүй байх шиг байна. Энэ талаар бид мэдээлэл өгөх арга хэмжээ авч байна. Гомдлын дагуу мэдээлэл өгөхөөр тодорхой ойлголттой болж эхэлсэн. Бид соён гэгээрүүлэх, мэдээлэл өгөх ажлаа цаашид үргэлжлүүлнэ. Засгийн газрын тогтоол гарснаас хойш иргэд тогны хэрэглээ үнэгүй болж байгаа юм байна гэж ойлгоод задгай хэрэглээнд шилжсэн.Гэхдээ журмаар зохицуулахаар болж, иргэд цахилгаанаа хамаагүй хэрэглэж болохгүй гэдгийг ойлгосон. Бичилттэй холбоотой гол маргаан нь зургаан циклд хуваагдсантай холбоотой. Өөрөөр хэлбэл, арваннэгдүгээр сарын хэрэглээ арванхоёрдугаар сард орсон байгаа юм. Энэ маргааныг бид ойлгомжтой тайлбарлах ажлыг зохион байгуулж байна. Цаашид хэрэглэгчид ойлгомжтой байх үүднээс билл өгөхөөр боллоо. Үүнд аль нь одоогийн хэрэглээ вэ, аль нь хөнгөлөлтөд орох вэ гэдэг тодорхой мэдээллийг багтаасан байна. Мөн иргэд өмнөх оны хэрэглээгээ мартчихсан учраас урьдчилсан байдлаар хэрэглэгчид мессеж илгээх ажлыг зохион  байгуулахаар болсон” гэв.