Боксын спортын ОУХМ Э.Цэндбаатар энэ сарын 10-нд гудамжаар нүцгэн явж, чанга дуугаар олон нийтийн газарт хашхирч, зүй бус үйлдэл гарсан. Түүнийг цагдаагийн алба хаагчид саатуулж, мэдүүлэг авч, ар гэрийнхэнд нь хүлээлгэн өгсөн байдаг. Мөн Э.Цэндбаатараас мансууруулах бодис, сэтгэцэд нөлөөт бодисын түргэвчилсэн шинжилгээ авсан бөгөөд одоогийн байдлаар дүгнэлт нь гараагүй байгаа аж. Түүний энэ үйлдлийг спорт сонирхогчид “Өнгөрсөн аравдугаар сарын 23-ны өдөр Эрдэнэт хотод болсон тэмцээнд оролцох үеэрээ “Golden boxing gem” клубийн дасгалжуулагч С.Эрдэнэбатад зодуулж, хүнд гэмтэл авсан. Үүнээс болж тархиндаа асуудалтай болсон байж магадгүй” гэх зэргээр өөр өөрийнхөө тайлбарлаж байна. Тэгвэл Э.Цэндбаатарын тархинд хүнд гэмтэл учруулсан байж болзошгүй хэмээн олон нийтэд ойлгогдоод байгаа дасгалжуулагч С.Эрдэнэбатаас зарим зүйлийг тодрууллаа.

-Сайн байна уу, та. Эрдэнэт хотод болсон боксын тэмцээний үеэр таныг Э.Цэндбаатартай маргалдаж, хүнд гэмтэл учруулснаас болж, түүнийг тархиндаа 32 оёдол тавиулсан тухай мэдээлэл цацагдсан. Таны учруулсан гэмтлээс болж Э.Цэндбаатар гудамжинд чармай нүцгэн гүйх үйлдэл гаргасан гэх хүн олон байна. Чухам юу болсон талаар мэдээлэл өгөхгүй юү?

-Өнгөрсөн аравдугаар сард “Шилдэг-8” боксын тэмцээн Эрдэнэт хотод болсон. Би тухайн үед гурван тамирчинтайгаа хамт шигшээ багийнхны байрлаж байсан зочид буудлын хажууханд байрласан юм. Тэмцээний үеэр тамирчид 22:00 цаг гээд унтаж, амарсан байх ёстой. Медалийн төлөөх тоглолтын өмнөх орой 24:00 цагийн үед би буудлынхаа урд талд тамхи татаад зогсож байлаа. Гэтэл Э.Цэндбаатар нэг залуутай хамт бөөн дуу шуу болчихсон хашхираад ирж байхаар нь хамт зогсож байсан хүндээ “Би дутагдлын хажуугаар дуугүй өнгөрч чадахгүй. Нэг үг хэлээд асуудал үүсэх байх” гэж хэлээд би буруу хараад зогсчихсон юм. Э.Цэндбаатартай хамт явж байсан тамирчин нь миний урдуур явж байгаад намайг харснаа “Өө, багшаа уучлаарай” гэхээр нь “Чи чинь согтуу байгаа юм уу. Хурдан очиж амар” гэж хэсэн. Г Би жаахан шударга талдаа болохоор хэний ч болохгүй байгаа зүйлийг шүүмжилчихдэг зантай. Тийм учраас тэр намайг дандаа хэл ам хийж байдаг гээд л дайрсан юм шиг байна лээ.этэл Э.Цэндбаатар нөгөө найзыгаа түлхэж, над руу агсарсан. “Чамайг яг одоо ална. Шигшээ багийхнаа дуудаж цааш харуулна. Би чамайг яг одоо алдаг дээрээ тавьчихсан байна” гээд л орилоод эхэлсэн.

Э.Цэндбаатар согтуу байсан учраас намайг хоёр, гурван удаа цохихдоо хальт цохиод газар духаараа унасан. Тэрнээс би түүнийг ганц ч удаа цохиогүй. Надад зодуулснаас болж толгойдоо оёдол тавиулж, ухаангүй эмнэлэгт хэвтсэн гэдэг нь худал цуурхал.  

-Энэ хэргээс болж та цагдаагийн байгууллагад шалгагдаж байсан юм билээ. Цагдаагаас ямар шийдвэр гарсан юм бэ?

-Зочид буудлын гадаа зодолдоод байгаа юм шиг орилолдоод байхаар нь хүмүүс цагдаа дуудчихсан юм билээ. Э.Цэндбаатар бидэн дээр ирээд удаагүй байхад Орхон аймгийн хоёр цагдаа ирсэн. Тэр оройдоо буудалдаа орж амарцгаагаад, бид маргааш өглөө нь мэдүүлэг өгсөн. Цагдаа Э.Цэндбаатарт хандаж “Чиний аав шиг хүн байна. Бид бичлэгийг чинь үзэхэд энэ хүн чамд ганц ч удаа гар хүрээгүй байна шүү. Мөн чиний нүүрэн хэсэгт гар хүрсэн шинж тэмдэг алга. Дух чинь газар унаснаас болж хөхөрч, хавдсан байна” гэж хэлэхэд Э.Цэндбаатар “Үгүй, би гомдолтой байна” гэж хэлсэн байна лээ. Цагдаагаас намайг “Улаанбаатар хот руу буцаж болохгүй” гэсэн ч би насанд хүрээгүй хүүхэд тэмцээнд авч явсан учраас хүргэж ирсэн. Цагдаагаас залгаад “Яаралтай ир” гэж хэлэхээр нь яваад очиход шүүхийн шинжээчийн дүгнэлт танилцуулсан. Дүгнэлтээр “Э.Цэндбаатарын биед өмнө нь авч байсан гэмтлүүд байна. Харин шинээр авсан гэмтэл алга” гэсэн. Ийм л зүйл болж, хэрэг хаагдсан.

-Үүний дараа Э.Цэндбаатартай уулзсан уу?

-Э.Цэндбаатар надтай муудахаас 30 минутын өмнө баарнаас гараад хоёр эмэгтэй, гурван залууг элдвээр хэлж, тэдэнтэй зодолдсон байна лээ. Нэг эмэгтэйг нь Э.Цэндбаатар цохиж, ухаан алдуулсан гэсэн. Тэр эмэгтэй нь хэрэг явдал болсны дараа миний таньдаг хүнээр дамжуулж, надтай утсаар яриад “Миний толгой өвдөөд байна, яах вэ” гэж асуусан. Би хүний өмнөөс шийдвэр гаргах ёсгүй болохоор юу ч зөвлөж чадаагүй. Хэрэг хаагдсаны дараа би Цэндээ рүү залгаад “Чамд ийм асуудал гарсан юм байна шүү дээ” гэхэд миний урдаас “Чи надаас уучлалт гуйх гэж залгаагүй юм уу” гэж байна лээ. Тэгэхээр нь би багшийн хувьд ганц, хоёр үг хэлээд утсаа салгахад хэргийг шалгаж байсан байцаагч миний утас руу залгаад “Чи яагаад Э.Цэндбаатар руу залгаж дарамтлаад байгаа юм бэ. Дахиж битгий залга” гэж хэлсэн. Тэрнээс хойш огт холбогдоогүй.

-Тэгэхээр таныг Э.Цэндбаатарын биед халдаагүй. Түүнийг хагалгаанд орох хэмжээний гэмтэл учруулаагүй гэж ойлгож болох нь ээ?

-Би багшийн хувиар ганц, хоёр үг хэлсэн. Тэрнээс гар хүрээгүй. Тэр надад зодуулснаас болж хагалгаанд орсон гэдэг нь худал. Түүнд гар хүрээгүй гэдгийг цагдаагийн байгууллагаас тогтоосон шүү дээ. Энэ бүх зүйл хяналтын камерын бичлэгээр ч нотлогдож байгаа.

-Э.Цэндбаатарыг хар тамхи хэрэглэсэн үедээ ийм үйлдэл гаргасан  гэх мэдээлэл байна. Тамирчдын хувьд мансууруулах бодис хэрэглэх боломжтой байдаг юм уу. Энэ талаар та байр сууриа илэрхийлэхгүй юү?

-Чухам яагаад чармай нүцгэн гудамжаар явсныг нь мэдэхгүй. Надад тэгсэн, ингэсэн ч гэж хэлэх эрх байхгүй. Хувь хүний асуудал учраас надад хэлэх юм алга. Харин Эрдэнэт хотод мэдүүлэг өгөх үеэр надаас хар тамхи, мансууруулах бодисын шинжилгээ авсан. Яагаад надаас шинжилгээ авч байгааг лавлахад “Дээрээс хар тамхины шинжилгээ ав” гэж хэлсэн гэж байна лээ. Би үүн дээр үнэхээр гайхсан.