-Халдвартай иргэд нь Хэнтий аймгийн төвөөр ороогүй-

Улаанбаатар хотоос Хэнтий аймаг руу хулгайн замаар очсон хоёр хүнээс коронавирусийн халдвар илэрсэн талаар бид мэдээлсэн билээ. Тодруулбал, уг иргэдийг албаныхан Цэнхэрмандал сумын пост дээрээс буцаасан ч хулгайн замаар буюу Хэрлэн голын урд талаар Дархан, Баянмөнх, Баянхутаг сумыг дайрч гэртээ харьсан гэх өгүүлэмжтэй байгаа аж. Ийм нөхцөл байдал үүссэн тул аймгийн Онцгой комисс яаралтай хуралдаж аймгийн хэмжээнд хөл хөдөлгөөнийг бүрэн хааж, бүх үйлчилгээний байгууллагын үйл ажиллагааг зогсоолоо. Аймгийн төвөөс орох, гарах хөдөлгөөн болон төв доторх явган болон автомашинтай иргэдийн хөдөлгөөнийг хязгаарласан байна. Энэ талаар Хэнтийн аймгийн Засаг дарга Ц.Идэрбатаас тодруулахад “Тэд Улаанбаатараас-Баянхутаг сумын нэгдүгээр багт баталгаагүй замаар зугтаж ирсэн. Гурван хүн ирснээс хоёроос нь халдвар илэрсэн. Одоогийн байдлаар хавьтлыг тодорхойлох, эерэг гарсан болон эхний ээлжинд тодорхой болсон хүмүүсээс нарийвчилсан шинжилгээ авах ажлыг эхлүүлээд байна. Энэ хоёр хүнээс өөр шинж тэмдэг илэрч, халуурсан хүн байхгүй. Мөн энэ хүмүүс нь Хэнтийн аймгийн төвөөр ороогүй, замдаа гурван сумаар дамжин өнгөрч хөдөө гэртээ ирсэн. Халдвар илэрсэн иргэд отроор малаа тууж ирсэн тууварчид байгаа. Бүх шаардлагатай арга хэмжээг авч ажиллаж байгаа учир иргэдийгээ тайван байхыг хүсье” гэлээ.